Idman.biz
"Təlim-məşq toplanışımızda hər şey plana uyğun gedir. Dünən ilk mərhələni başa vurduq, 4 gün sonra isə ikinci mərhələyə başlayacağıq. Daha yaxşı çalışıb çempionata qədər hazır duruma çatmağa çalışacağıq. Bu mövsüm də yuxarı pillələr uğrunda mübarizə aparmaq istəyirik. Əlimizdən gələni edərək istədiyimizə nail olmağa çalışacağıq".
İdman.biz xəbər verir ki, bu fikirləri Futbolinfo.az-a açıqlamasında "Turan Tovuz"un müdafiəçisi Faiq Hacıyev deyib
26 yaşlı futbolçu komandanın hazırlığının gedişindən razılığını bildirib: "Keçən mövsümkü nəticəmizin təsadüf olmadığını göstərərək, ondan da yaxşısını edə biləcəyimizi sübut etmək istəyirik. Hər şey öz əlimizdədir. Məşqlərdə daha yaxşı çalışıb səbrlə və diqqətlə oynasaq, istədiyimiz nəticələri əldə edə bilərik".
Faiq həmçinin komandanın yeni futbolçularına da toxunub: "Hər şey yaxşı gedir. Yeni oyunçulara da oyun üslubumuzu başa salmağa çalışırıq. İnşallah, onlar da komandaya uyğunlaşdıqdan sonra hər şey istədiyimiz kimi olacaq".
Şəxsi hədəflərinə toxunan müdafiəçi bildirib: "Hər mövsüm olduğu kimi yenə ötən illərdən fərqli olaraq daha çox çalışmalı olduğumu bilirəm. İnşallah, komandama daha çox fayda verməyə çalışacağam. Səhvlərimin üzərində işləməyi sevən biriyəm. Onları aradan qaldırıb daha yaxşı Faiq göstərmək istəyirəm".
Son olaraq rəqabətli çempionatın onları daha da inkişaf etdirəcəyinə ümidvar olduğunu deyib: "Düşünürəm ki, bizi maraqlı bir çempionat gözləyir. Nə qədər rəqabət olsa, bizim üçün daha yaxşıdır. Bu, inkişafımızda böyük rol oynayacaq".
İdman.biz
