Idman.biz
"Turan Tovuz"un hücumçusu Orxan Əliyevin Sportal.az-a müsahibəsi
- Komandanız son turda "Sabah" üzərində 2:1 hesabı ilə qələbə qazandı. Rəqibin meydanda 10 nəfərlə qalması qələbə qazanmağınızda böyük rol oynadı?
- Bu görüş artıq geridə qaldı. O oyuna da yaxşı hazırlaşmışdıq. Meydanda 10 nəfərlə qalmaq məsələsinə gəldikdə, futbolda bu cür hallar baş evrir. Bizim hədəfimiz qələbə qazanmaq idi. Nə baş versəydi belə, qalibiyyəti çox istəyirdik. Əsas odur ki, bunu reallaşdırdıq.
- "Turan Tovuz" uzun müddət idi ki, qələbə qazana bilmirdi. "Sabah" üzərindəki qələbə sizə böyük motivasiya verib?
- Təbii ki, qələbə bizə böyük motivasiya verir. Məşqçilər korpusu və rəhbərlik bizə daim yaxşı dəstək verir. Komanda olaraq özünəinam yaxşı səviyyədədir.
- Komanda bu gün "Araz-Naxçıvan"la qarşılaşacaq. Matç haqda hansı fikirdəsən?
- "Sabah"la görüşdən sonra elə "Araz-Naxçıvan"la matça fokuslanmışıq. Bu oyunun asan keçməyəcəyi dəqiqdir. Oyuna yaxşı hazırlaşmışıq. Hər şeyi edəcəyik ki, "Araz-Naxçıvan"a qalib gələk. Onların yaxşı komanda olduğunu yaxşı başa düşürük.
- Yəqin ki, bu görüşdə oynamağı daha çox istəyirsən? Hər halda, "Araz-Naxçıvan" sənin sabiq komandadndır. İkiqat motivasiyaya sahibsən?
- Mən hər oyunda oynamaq istəyirəm. Amma qərarları verən baş məşqçidir. Bu şansı əldə etmək üçün daim çalışıram. Nə vaxt şans verilsə, oynamağa hazıram.
- "Turan Tovuz"un avrokubok şanslarını necə dəyərləndirirsən? "Qarabağ" ölkə kubokunu qazanarsa, indiki pillədə qalaraq, avrokuboklara vəsiqə qazana bilərsiz...
- Avrokuboklara yollanmaq şansımız var. Digər klublardan asılı olmayaraq, biz daim çalışırıq və hər oyuna uğurlu nəticə üçün çıxırıq. İnanıram ki, avrokuboklara vəsiqə qazanmaq istəyimiz reallaşacaq. Çünki yaxşı komandaya sahib olduğumuzu bilirəm.
- Səncə, "Turan Tovuz"dakı karyeran yaxşı alınır, yoxsa özünü göstərməyin üçün zamana ehtiyacın var?
- Düzünü desəm, hələ ki tam olaraq potensialımı aça bilmirəm. Çünki az-az oynayıram. Öz üzərimdə daha çox çalışacam ki, həmin şans mənə verilsin. "Turan Tovuz"a daim xeyir vermək istəyirəm. Yaxşı kollektivə sahibik.
İdman.biz
