Lent.az
Kazan "Rubin"inin sabiq baş məşqçisi Kurban Berdıyev yoxa çıxıb.
Lent.az Rusiya mediasına istinadla bildirir ki, Azərbaycanın "Turan Tovuz" klubuna rəhbərlik edən mütəxəssis Rusiyaya gedib və klub rəhbərliyinin zənglərinə cavab vermir.
"İyunun əvvəlində klub rəhbərliyinin baş məşqçi ilə görüşü keçirilməli idi, lakin Berdıyevdən heç bir zəng daxil olmayıb. Rəsmilər 72 yaşlı mütəxəssislə əlaqə saxlamağa çalışsalar da, heç bir nəticə əldə olunmayıb", - mənbə bildirib.
Berdıyev 2024-cü ildən "Turan Tovuz"u çalışdırır. Bundan əvvəl məşqçi Mahaçqala "Dinamo"sunda işləyib. Mütəxəssis Kazan "Rubin"ində çalışarkən böyük uğurlar qazanıb. Onun rəhbərliyi altında klub iki dəfə Rusiya çempionu olub və Rusiya kubokunun qalibi olub, həmçinin Çempionlar Liqasında "Kamp Nou"da "Barselona"nı məğlub edib.
Məsələ ilə bağlı "Turan Tovuz" futbol klubu bəyanat yayıb.
Lent.az-ın məlumatına görə, bəyanatda bildirilir ki, komandanın baş məşqçisi Kurban Berdıyev hazırda Azərbaycandadır:
"Mövsümün başa çatmasına baxmayaraq baş məşqçimiz Kurban Berdıyev ölkəmizi tərk etməyib və növbəti mövsümün hazırlıq planlarını həyata keçirmək və daha güclü heyət formalaşdırmaq üçün mütəmadi olaraq klub rəhbərliyi ilə fikir mübadiləsi aparır. Qeyd etmək istəyirik ki, baş məşqçimizlə müqaviləmiz davam edir və klub rəhbərliyi daha iddialı komanda formalaşdırmaq üçün Kurban Berdıyevə tam dəstəyini nümayiş etdirir. Azarkeşlərimizi və futbol ictimaiyyətini dəqiqləşdirilməmiş, klubun imicinə zərər vuran, əsassız və yalan xəbərlərə etibar etməməyə çağırırıq. Bildirmək istəyirik ki, təlim-məşq toplanışı, transfer siyasəti, infrastruktur və digər layihələrlə bağlı bütün məlumatlar rəsmi olaraq klubumuz tərəfindən ictimaiyyətə açıqlanacaq".
