Sport24.az
"Bəzi problemlərimiz var. Stadionumuz olmadığına görə, ev oyunlarımızı məcbur olub Siyəzəndə keçiririk. Heyətimizin əsasını Region Liqasında oynayan futbolçular təşkil edir. Buna baxmayaraq, mövsümə yaxşı başlamaq istəyirdik. Şükürlər olsun ki, komanda ilk turda xarakter göstərdi və bizdən daha təcrübəli "Göygöl"ü məğlub edə bildi. Bizə qələbə vacib idi. Çempionatda keçirdiyin ilk oyundan çox şey asılı olur. Ümid edirəm uğurun ardı gələcək". Bu sözləri Sport24.az-a açıqlamasında "Şimal"ın oynayan məşqçisi Tural Cəlilov deyib.
Cəlilov protokolda baş məşqçi kimi onun yox, Rəcəb Mahmudovun adının qeyd olunmasına da aydınlıq gətirib: "Region Liqasında oynayan baş məşqçi idim. Komandaya həm meydanda, həm də ondan kənarda rəhbərlik edirdim. Amma II liqanın Əsasnaməsində qeyd olunub ki, oynayan baş məşqçi ola bilməz. Seçim qarşısında qaldım və sonda meydanda olmağa qərar verdim. Komandaya yenə mən rəhbərlik edirəm. Rəcəb Mahmudova gəlincə, o, ilk gündən məşqçilər korpusunda yer alır. Bu səbəbdən baş məşqçi kimi protokolda onun adı yazılacaq".
Qeyd edək ki, II Liqanın ilk turunda "Şimal" səfərdə "Göygöl"ü 3:2 hesabı ilə məğlub edib.
ABDULLA İSMAYILOĞLU
