Tural Bayramlı: “Onun rəhbərliyi altında çıxış etməklə bir qədər də “böyüyürəm”

"Turan Tovuz" XXXIII ölkə çempionatının ilk turunda səfərdə "Neftçi" ilə qarşılaşsa da, meydanı xalsız tərk etmədi. Tovuzlular meydan sahiblərindən fərqli, daha aqresiv və baxımlı oyunla yadda qaldılar. Qonaqların heyətində özünü yaxşı tərəfdən göstərən futbolçulardan biri də Tural Bayramlı idi. Mövsümlərarası fasilədə "boz qurdlar"la anlaşan futbolçu oyundan sonra Sport24.az-ın əməkdaşının suallarını cavablandırıb.  

- İlk turda iddialı "Neftçi"nin qonağı olduz. Matçla bağlı fikirlərini bölüşərdin...
- "Neftçi" kimi köklü və ənənəsi olan komandaya qarşı oynamaq həmişə çətib olub. Məncə, ilk oyun üçün pis çıxış etmədik və səfərdən 1 xalla dönə bildik. Əlbəttə ki, daha yaxşı çıxış etmək, hər tur maksimum xal götürmək istəyirik.

- Bir çox baş məşqçilərin rəhbərliyi altında çıxış etmisən. Hazırda isə Kurban Berdıyevin sərəncamındasan. Rusiyalı mütəxəssisi digərlərindən fərqləndirən nədir?
- Kurban müəllimi bütün dünya tanıyır. Onun futbolçulara yanaşması, futbol fəlsəfəsini aşılması fərqlidi. O, hər oyunçuya fərdi yanaşır, futbolçunun potensialını tam ortaya qoyması üçün hər cür şərait yaradır.

- "Turan Tovuz"a yeni transfer olunan zaman saytımıza açıqlamanda  "fəxr edirəm ki, Kurban Berdıyevin bəyəndiyi və komandasına cəlb etdiyi ilk azərbaycanlı futbolçuyam" söyləmişdin. Artıq iki aya yaxındı rusiyalı mütəxəssisin rəhbərliyi altında çalışırsan. Bu müddətdə ondan nə öyrənmisən?
- Kurban müəllim kimi adından söz etdirmiş təcrübəli məşqçinin bəyəndiyi futbolçular siyahısında yer almaq çox xoşdu. Kurban Berdıyevin sərəncamında olan futbolçu inkişaf etməlidi. Başqa cür də ola bilməz. Mən də onun rəhbərliyi altında çıxış etməklə bir qədər də "böyüyürəm".

- Komandanın qarşısına hansı hədəf qoyulub?
- Məqsədimiz avrokuboklara vəsiqə qazanmaqdı. Bunun üçün əlimizdən gələnin ən yaxşısını etməyə çalışacağıq.

- Yəqin ki, avrokuboklarda mübarizə aparan klublarımızın oyunlarını izləyirsən. Fikirlərini bilmək istərdik...  
- Bu mövsüm təmsilçilərimiz qitəmiqyaslı yarışlara yaxşı başlayıb. "Qarabağ"ın böyük təcrübəsi var, onlar haqqında əlavə nəsə deməyə ehtiyac yoxdu. "Zirə" ilə "Sabah"da mərhələ adlamaqla hamımızı sevindirdi. Hər 3 klubumuz növbəti oyunlarda da uğur arzulayıram. Onlar nə qədər uzağa getsələr bir o qədər UEFA-nın reytinqində mövqeyimizi yaxşılaşdıracağıq. Bu isə gələcəkdə digər klublarımızın da işinə yarayacaq.

ABDULLA İSMAYILOĞLU