Sport24.az
"Oyuna yaxşı hazırlaşmışdıq. Rəqibimiz ilk turda qələbə qazanmaqla öz gücünü göstərmişdi. Səviyyəli, fiziki cəhətdən hazırlıqlı oyunçulardan qurulmuş güclü komandaya qarşı oynadıq". Bu sözləri Sport24.az-a açıqlamasında İkinci Liqa təmsilçisi "Xankəndi"nin futbolçusu Tunar Mütəllimov deyib.
26 yaşlı futbolçu komandasının ötən gün "Quba"nı 4:0 hesabı ilə məğlub etdiyi matçla bağlı fikirlərini bölüşüb:
"Səfərdən 3 xalla qayıtmaq istəyirdik. Şükür ki, bunu bacardıq. İlk oyunumda komandam qələbə qazandığı üçün sevinirəm. Ümid edirəm ki, davamı gələr. Məqsədimiz yalnız çempionluqdur. Bu, asan olmayacaq. Bütün rəqiblərə eyni yanaşırıq. Ümumiyyətlə, çempionluğa oynayan komandalara qarşı rəqiblər həmişə başqa həvəslə meydana çıxırlar. Əziyyət çəkməliyik və matçlara ciddi hazırlaşmalıyıq. Bundan sonra qələbələrin ardı gələcək. Komandanın heyətində təcrübəli futbolçular var. Yolumuz uzundur, ümidvaram ki, bu il də çempionluğu qeyd edərik. İkinci Liqada çempion olmaq üçün kifayət qədər gücümüz var".
Qeyd edək ki, "Xankəndi" iki turdan sonra 6 xalla II Liqanın lideridir.
