Sport24.az
ABŞ Prezidenti Donald Tramp Vaşinqtonda keçirilən 2026 FIFA Dünya Kubokunun püşkatma mərasimi çərçivəsində 2025-ci il FIFA Sülh mükafatına layiq görülüb. Sport24.az xəbər verir ki, yeni təsis olunan mükafatı ona ali futbol qurumunun rəhbəri Canni İnfantino təqdim edib.
Bununla bağlı nümayiş etdirilən videoçarxda Trampın digər münaqişələrlə yanaşı, Ermənistanla Azərbaycan arasında sülh istiqamətində gördüyü işlər və sənədin imzalanması da qeyd olunub.
Trampa verilən tunc mükafat Azərbaycanın Xalq rəssamları Səlhab Məmmədov və Əli İbadullayevin "Düşüncələr və arzular" adlı məşhur əsərinin miniatür variantıdır.
Bununla bağlı Rəssamlıq Akademiyasının prorektoru, Xalq rəssamı Səlhab Məmmədov İctimai Televiziyaya danışıb: "Təqdimat çox gözəl idi. Biz öz mədəniyyətimiz və eskizimizlə təsdiq etdik ki, biz sülh sevər xalqıq.
Bizə məlumat gəldi ki, müsabiqə var. Əli ilə kiçik variantın üzərində işləyib göndərdik. Onun əsasında döş nişanı və medal hazırlandı. Bizim işin o səviyyədə təqdim ediləcəyini gözləmirdik. Bu çox böyük xoşbəxtlikdir".
Qeyd edək ki, Trampa təqdim edilən tunc heykəl Azərbaycanın Xalq rəssamları Səlhab Məmmədov və Əli İbadullayevin BMT-nin Cenevrədəki Millətlər Sarayının qarşısında ucaldılmış, sülh rəmzi sayılan "Düşüncələr və arzular" abidəsinin miniatür variantıdır.
