Sport24.az
RƏŞAD QASIMOV
Martın 28-də Tovuz şəhər stadionunda inşa olunan əsas korpus binasının açılışı gerçəkləşdi. Tədbirə Tovuz Rayon İcra Hakimiyyətinin, AFFA-nın, Peşəkar Futbol Liqasının rəhbərliyi, futbol ictimaiyyətinin nümayəndələri və jurnalistlər qatılmışdı.
Ümumi sahəsi 3 min kvadrat metrdən çox ərazini əhatə edən buna zirzəmi ilə birlikdə 4 mərtəbədən ibarətdi ki, bura da 30 otaq daxildi. Fitnes zalı, toplantı, həkim və fizioterapiya otaqları ilə yanaşı, məşqçilər, həkimlər və inzibati işçilər üçün də ayrıca otaqlar ayrılıb. Burada futbolçuların vaxtlarını maraqlı keçirmələri üçün stolüstü tennis, bilyard, videooyun avadanlıqları ilə təmin olunmuş böyük istirahət guşəsi də yaradılıb. Bütün otaqlar ən müasir və zəruri avadanlıqlarla təchiz edilib.
Bəlkə də bu, çoxları üçün adi bir tədbir kimi görünə bilər. Amma məhz həmin əsas korpus infrastruktur baxımından "Turan Tovuz"un işlərini olduqca asanlaşdıracaq. Belə ki, əvvəllər akademiya binasında həm əsas komanda, həm də aşağı yaş qruplarının futbolçuları məskunlaşırdı. Təbii ki, bu da müəyyən çətinliklər yaradırdı.
Yeni bina istifadəyə verildikdən sonra əsas komanda ilə akademiya bir-birindən ayrılacaq və bu da bütün oyunçuların şəraitini yaxşılaşdıracaq.
Ümumiyyətlə, "Turan Tovuz" Akademiyasının gələcəkdə Azərbaycan futboluna yeni simalar bəxş edəcəyi heç kimdə şübhə doğurmur. Çünki qərb təmsilçilərimizdən istər "Turan Tovuz", istərsə də "Kəpəz" futbol bölgəsidir. Gəncə və Tovuz həmişə ölkəmizə adlı-sanlı simalar bəxş edib.
Tovuz futbolunun yetirmələri daim ölkəmizdə üzdə olanlar sırasında dayanıb. Bu torpağın neçə-neçə yetirməsi milli komandamızın şərəfini qoruyub. Açılış mərasimində çıxış edən qərb təmsilçisinin rəhbəri Ehtiram Quliyev də bu məqama xüsusi toxanaraq Tovuzda futbolun irsi olduğunu xatırlatdı. O, bölgədə futbolun inkişafı üçün əllərindən gələni edəcəklərini və Prezident İlham Əliyevin idmana xüsusi qayğı göstərdiyini söyləməklə də yadda qaldı. Quliyev AFFA-nın hər zaman yanlarında olduğunu deməklə layihənin tək bölgə üçün deyil, ölkə fitbolunun inkişafına yönləndiyini nümayiş etdirdi.
AFFA-nın İnkişaf Strategiyasının əsas tezislərindən biri də məhz infrastruktur layihələrinin həyata keçirilməsidi.
İstənilən diskussiyada futbolumuzun ən böyük probleminin uşaq futboluna diqqətin ayrılmaması göstərilir. Tovuzda bu cür layihənin start götürməsi gələcəyə nikbin boylanmağa əsas verir. Əlbəttə, bu, bünövrədi, "daşların yerinə oturması" üçünsə 5, 7, bəlkə də 10 il zaman lazımdı. Ancaq nə zamansa başlamalısan ki, qaranlıq tunelin sonunda işıq görəsən.
Ancaq heç vaxt "avazın yaxşı gəlir, oxudiğun Quran olsa", - atalar məsəlimizi unutmaq olmaz. Bəli, layihə və ideyanı alqışlamaq lazımdı. Ancaq uşaqların düzgün inkişafı üçün savadlı mütəxəssislərin olması indiki məqamda ən vacib amildi. "Avazla kitab" üst-üstə düşəcəyi təqdirdə isə yaxın illərdə mərhələli şəkildə əvəlcə Tovuzun aşağı yaş qrupları üzrə komandalarının inamlı çıxışı, ardınca yeniyetmə və gənclər yığmalarımıza axını və nəhayət, əsas milliyə yüksəlişinin şahidi olacağıq. Belədə, ölkə daxilində rəqabət də artacaq və…
Və ən əsası Tovuz akademiyası ilə kifayətlənmək olmaz, çünki bir güllə bahar gəlmir. Bütün bölgələrdə bu cür layihələri həyata keçirmək gərəkdi. Bax, onda AFFA-nın İnkişaf Strategiyasının kağızda yox, əməldə həyata keçirməsini iddia edə biləcəyik.
