Sport24.az
Qış "transfer pəncərəsi"ndə Konor Qallageri 34,7 milyon funt sterlinqə Madrid "Atletiko"sundan transfer edən "Tottenhem", Riçarlison və Məhəmməd Kudusun uzunmüddətli zədələnməsi səbəbindən hücum xəttini gücləndirmək üçün yeni forvard axtarışındadır. Sport24.az türkiyəli jurnalist Çağatay Çelikə istinadən xəbər verir ki, "Tottenhem" "Mançester Siti"nin hücumçusu Ömər Marmuşla maraqlanır.
Forvard həmçinin "Aston Villa" və Türkiyənin "Qalatasaray" komandalarının maraq dairəsindədir.
Mənbənin sözlərinə görə, Marmuşun prioriteti İngiltərədə qalmaqdır və Misir millisinin üzvü yalnız "Mançester Siti"dən icarəyə ayrılmağı düşünür.
Qeyd edək ki, Marmuş bu mövsüm "Mançester Siti"də cəmi 389 dəqiqə oynayıb, bir qol vurub və bir məhsuldar ötürmə edib. "Mançester Siti" onu bir il əvvəl Frankfurt "Ayntraxt"ından 59 milyon funt sterlinqə alıb.
