Idman.biz
"Düşdüyümüz vəziyyət hər kəsə məlumdur. Hamımız çox pis vəziyyətdəydik. Çox pis hesabla məğlub olduq. Bununla belə, ruhdan düşmədik. Belə deyək də, futbolumuza mane olacaq hər şey oldu bu son 3-4 gündə".
İdman.biz xəbər verir ki, Azərbaycan millisinin oyunçusu Toral Bayramov DÇ-2026-nın seçmə mərhələsində Ukrayna ilə oyunun nəticəsindən danışarkən deyib.
O qeyd edib ki, millinin heyətindəki oyunçuların əsas məqsədi xal üçün vuruşmaq olub.
"Düşünürəm ki, bu gün əlimizdən gələni yox, əlimizdən gəlməyəni edirdik. Biz buyuq. Bununla da göstərdik ki, oyunumuzu daha da yaxşılaşdırıb, belə mübarizə ilə daha yaxşı uğurlar qazana bilərik", – Bayramov deyib.
İslandiya millisi ilə keçirilən ilk oyundakı məğlubiyyətin səbəblərini şərh etmək istəməyən oyunçu sadəcə onu bildirib ki, Ukrayna ilə keçirilən matçda meydançada oyunçularda döyüşçü ruhunu görüb: "Bir-birimizə baxıb motivasiya olurduq. Bizə lazım olan da bu idi".
Millinin sabiq baş məşqçisi Fernandu Santuşla bağlı sualdan yayınan oyunçu, keçmişlə bağlı danışmaq istəmədiyini deyib.
"Bu gün yaxşı nəticə əldə etmişik. İndidən sonra da vuruşaraq irəli baxacağıq" – deyə futbolçu fikrini tamamlayıb.
Qeyd edək ki, sentyabrın 9-da DÇ-2026-nın seçmə mərhələsində Azərbaycan millisi Ukrayna yığması ilə qarşılaşıb. Tofiq Bəhramov adına stadionda keçirilən matç 1:1 hesabı ilə yekunlaşıb. Millimiz bununla da DÇ-2026-nın seçmə mərhələsində ilk xalını qazanıb.
Sentyabrın 6-da Reykyavikdə "Lauqardalsvöllur" stadionunda İslandiya yığması ilə keçirilən ilk görüşdə Azərbaycan millisi 0:5 hesabı ilə məğlub olub.
İdman.biz
