Toral Bayramov: "Biabırçı nəticələr, biabırçı oyunlar..."

Azərbaycan millisinin futbolçusu Toral Bayramov Haitiyə 0:3 hesabı ilə uduzduqları yoldaşlıq oyunundan sonra jurnalistlərin suallarını cavablandırıb. Sport24.az həmin müsahibəni təqdim edir.

- Yığma Haitiyə də məğlub oldu. Fərqli nəticə qazanacağınızı düşünürdüz?

- Haitinin güclü rəqib olduğunu bilirdik, onları analiz etmişdik. Zəif və güclü tərəflərindən xəbərdar idik. Baxmayaraq, ilk hissədə 0:1 uduzduq, amma üstün tərəf biz idik. Hətta qollar vura bilərdik, amma alınmadı. Son nöqtəni qoya bilmədik. İkinci hissədə də hesabda önə keçmək istədik. Amma təəssüflər olsun ki, alınmadı. Qarşıda Belarusla oyunumuz var. Həmin görüşdə qələbə qazanmağa çalışacağıq.

- Start heyətində "Qarabağ"ın üzvləri və əvvəllər də bu komandada oynamış, bir-birini yaxşı tanıyan oyunçular var idi. Ən azından "Qarabağ"n göstərdiyi oyunun yarısını göstərməyə nə çatmadı?

- Biz bir yol seçmişik, o yol üzərində gedirik. Düşünürəm ki, pis də getmirik. İnanıram ki, istədiyimiz nəticəni və nəticələri əldə edəcəyik. Komandaya və məşqçimizə də inanıram. Bu pis vəziyyətdən çıxacağıq.

- Qarşıda Belarusla görüş sizi gözləyir. Son oyunda Tacikistanı 5:0 məğlub ediblər. Bu matçda da azərbaycanlı fanatlar üzüləcək?

- Milli komanda elədir ki, orada sırf azarkeşlər və ya sırf kiminsə üçünsə oynamırsan. Orada bayrağın, vətənin, xalqın üçün oynayırsan. Təbii ki, məğlub olmaq istəmərik. Heç bir oyunda uduzmaq istəmirik. Sadəcə bəzən nələrsə çatışmır, nələrisə düzgün edə bilmirik, son nöqtələri qoya bilmirik. Ya da hardasa diqqətsiz oluruq. Çalışacağıq ki, bu vəziyyətdən çıxaq, toparlanaq. İnanıram ki, hər şey yaxşı olacaq.

- Növbəti görüş "Bank Respublika Arena"dadır, Haitiyə qarşı görüş Sumqayıtda keçirildi. Bu amillər komandaya təsir edir? Məşq fərqli yerdə, oyunlar fərqli yerdə...

- Düşünürəm ki, yerli çempionatda oynayan futbolçular üçün təsir etməz. Çünki ən azından ildə iki dəfə bütün stadionlarda oynayırıq. Bundan əvvəl də oynamışıq. İnanmıram ki, onun təsiri olsun. 

- "Qarabağ"da həm yerli, həm də avrokuboklarda uğurlu nəticələr qazanırsız. Amma millidə davamlı olaraq bu qədər biabırçı nəticələr, biabırçı oyunlar sizi yormur?

- Biabırçı nəticələr, biabırçı oyunlar....Bu suala cavab verməyəcəyəm.

- Biabırçı nəticələrlə razılaşmırsan, yoxsa suala cavab vermək istəmirsən?

- Cavab verməyəcəyəm.