Toral Bayramov "Qarabağ"ın qələbələri, Çempionlar Liqası və milli komanda haqqında danışdı

"Qarabağ"ın futbolçusu Toral Bayramovun QOL.az saytına müsahibəsi

- Səfərdə "Karvan"a 2:0 hesabı ilə qalib gəldiniz. Oyunla bağlı nə deyə bilərsiniz?

- Çox çətin oyun oldu. Həm hava isti idi, həm də meydança amili var idi. Ağır oyundan çıxmışdıq. Psixoloji cəhətdən yorğunluq var idi. Şükürlər olsun ki, qalib gəldik, mövsümdə ilk qələbəmizi qazandıq. Növbəti oyunlarda da 3 xal qazanmağa çalışacağıq.

- Süni qazon işinizi nə dərəcədə çətinləşdirdi?

- Əlbəttə, süni qazonda oynamaq çətindir. Dünyanın əksər yerində təbii ot örtüyüdür. Süni qazon mikrozədələrə gətirib çıxardır. Lakin nə etmək olar? İşimizdir budur.

- Anşlaq yaşanan "Ferensvaroş"la matçdan sonra bu görüşə köklənmək nə dərəcədə çətin idi?

- Əlbəttə, fərq var. Lakin yenə deyirəm, bu, bizim işimizdir. Burada qalib gəlməsək, oralara gedib çıxa bilmərik. Ona görə də əsas daxili çempionatdır. Burada qalib gəlməsək, avrokuboklarda çıxış edə, xalqımızı sevindirə bilmərik. Ölkə çempionatda hər matça qələbə üçün çıxırıq.

- Çempionlar Liqasının Liqa mərhələsinin püşkünü necə dəyərləndirirsiniz?

- Çempionlar Liqasında zəif rəqib yoxdur. Maraqlı oyunlar bizi gözləyir. Hər matç çox gərgin keçəcək. Bacardığımız qədər çox xal toplamaq və tarix yazmağa davam etmək istəyirik.

- "Qarabağ"ın potensialı bu rəqiblərlə oyunda neçə xal yığmağa imkan verir?

- Nəsə deyə bilmərəm. Futboldur, hər şey ola bilər. Dəfələrlə bunu sübut etmişik. Əsas olan qarşılaşmalara komanda şəklində düzgün hazırlaşmaqdır. Hamı əlindən gələni edəndən sonra yaxşı nəticə qazanmaq mümkündür.

- Qarşıdan milli komandamızı İslandiya və Ukrayna ilə görüşlər gözləyir. Həmin oyunlardan gözləntiləriniz nədir?

- Bizi ağır oyunlar gözləyir. Uzun səfərimiz olacaq. Ölkəmizi layiqincə təmsil etmək istəyirik. Əlimizdən gələni yox, gəlməyəni edəcəyik ki, səfərdən uğurlu nəticə ilə qayıdaq.

- "Qarabağ"ın avrokuboklardakı inamlı çıxışı millinin oyununa müsbət təsir göstərə bilər?

- Qələbə həmişə qələbədir. Qalib gələndə yüksək əhval-ruhiyyə olur. İnanırıq ki, "Qarabağ"ın çıxışı milliyə də müsbət təsir göstərəcək.

İdman.biz