Idman.biz
"Zirə" Misli Premyer Liqasının VII turunda evdə "Neftçi" ilə 2:2 hesablı heç-heçə edib. "Qartallar"ın portuqaliyalı qapıçısı Tiaqo Silva matçdan sonra futbolinfo.az-a müsahibə verib:
– "Neftçi"yə qarşı oyunda qazanılan bir xalı qənaətbəxş hesab edirsiniz?
– Çətin oyun oldu. Hər iki komanda qalib gəlmək istəyirdi. Çempionatın iki güclü komandası qarşılaşdı. Əlbəttə, biz qalib gəlmək istəyirdik, amma alınmadı. Buna baxmayaraq, hər iki komandaya yaxşı mübarizəyə görə təbriklər düşür.
– Baş hakim Kamal Umudlunun verdiyi qərarlardan razı qaldınız?
– Oyunun bu qədər tez-tez dayanması futbolu çətinləşdirir. Hakimlər bəzən futbolçulardan çox televizorda görünmək istəyirlər. Biz oynamaq istəyirik, amma imkan vermirlər. Penalti olub-olmaması barədə qərar üçün təxminən 10 dəqiqə gözlədik. Belə hallar daha sürətli və ədalətli şəkildə həll olunmalıdır. Məsələn, IV turda "Qarabağ"a qarşı oyunda buraxdığımız qolun düzgünlüyünə əmin deyiləm. Amma o vaxt hakim çox tez qərar verdi. Yəni VAR-dan öncə, artıq qərar bəlli olmuşdu. Bu dəfə isə onu görmədik.
– Niyə belə düşünürsünüz?
– Çünki o, "Qarabağ" idi. Amma bu oyunda "Zirə" üçün eyni dinamikliyi və qərarları görmədim. Biz "Qarabağ"a hörmətlə yanaşırıq, onların uğurlarına sevinirik. Necə ki, Çempionlar Liqasında sevinmişdik. Amma həm Premyer Liqada, həm də Avropada biz yalnız ədalətli hakim idarəçiliyi istəyirik. Əminəm ki, bu vəziyyət "Qarabağ"ın xeyrinə olsaydı, hakim dərhal "qol" deyib, sonra VAR-a baxardı. Mən sadəcə istəyirəm ki, hamıya eyni münasibət göstərilsin. Kaş "Qarabağ"a qarşı yanaşma bizə də olardı.
– Yəni 90+5-ci dəqiqədə sizin lehinizə qərar verildi, amma "ağ-qaralar" və futbol ictimaiyyətinin əksəriyyəti bunu haqsız hesab etdi. Bu qərar yerində idi?
– Mən azarkeşlərin emosiyanallığını anlayıram. Amma orada ayaq tapdanması vardı. Hakim də buna görə elə qərar verdi.
– Milli fasiləyə hansı ab-havada yollanırsınız?
– İndi istirahət vaxtıdır. Milli komandaya gedən futbolçularımızı gözləyirik. Onlara uğurlar arzulayıram. Qayıdandan sonra bizi qalib gəlməli olduğumuz oyunlar gözləyir.
