Sport24.az
"Səfərə qələbə qazanmaq üçün gedirik. Üç xal bizə çox lazımdır". Bu sözləri Sport24-ə açıqlamasında "Karvan"ın futbolçusu Bəhruz Teymurov deyib.
30 yaşlı hücumçu bu gün "Qəbələ"yə qarşı keçirəcəkləri I Liqanın XVI turunun oyunu ilə bağlı fikirlərini bölüşüb:
"Ötən həftə "Cəbrayıl"la oyunda (1:1) heç nədən, hakimin səhvindən qapımıza penalti verildi. Bizim iki xalımız həmin vaxt əlimizdən alındı. "Qəbələ" ilə matça çox ciddi hazırlaşmışıq. İlk növbədə ikinci pilləni qorumağa çalışacağıq. Hələlik çempionatda çoxlu oyun qalıb. Çempion olmaq istəyirik. Bunu bacarmasaq, hazırkı mövqeyimizi qorumaq niyyətindəyik. Premyer Liqaya əsas namizədlərdən biriyik. Buna nail olmaq üçün əlimizdən gələni edəcəyik".
Forvard komandanın potensialının çox olduğunu söyləyib:
"Məncə, "Qəbələ"dən zəif deyilik. Əksinə bizdə olan oyunçular təcrübə baxımından rəqibi üstələyir. Rəqibi elə də güclü görmürəm. 8-ci turda hakimlərin səhvinə görə bu komandaya məğlub olmuşduq. Yenə deyirəm, səfərə üç xal üçün gedirik. Hələlik itiriləsi heç nə yoxdur. Qarşıda 12 tur var. "Qəbələ" bütün oyunların hamısında qələbə qazanmayacaq, onlar da xal itirəcəklər".
Qeyd edək ki, bu gün baş tutacaq "Qəbələ" - "Karvan" oyunu saat 15:00-da start götürəcək.
