Texniki məğlubiyyətə görə cəzalandırılan Naxçıvan komandalarının üzləşdiyi çətinliklər bəlli olub

AFFA İntizam Komitəsi tərəfindən ötən gün texniki məğlubiyyətlə cəzalandırılan Naxçıvan komandalarının üzləşdiyi problemin səbəbi müəyyənləşib.

Bu barədə "Report"a Naxçıvan Futbol Federasiyasının koordinatoru Sərvin Heydərov məlumat verib.

Qurum rəsmisi Naxçıvan zonasında oyunların Əsasnaməyə uyğun keçirildiyini söyləyib:

"Bu məsələni hazırda müzakirə edirik. Naxçıvan zonasında 128 oyundan, demək olar ki, 99 faizi baş tutub. Yalnız üç matçda problem yaranıb. Bəziləri yetərsay olmadığına görə baş tutmayıb. Məsələn, hava soyuq olub, hansısa valideyn uşağını oyuna buraxmayıb. Bəziləri müəyyən problemlər səbəbindən gecikib deyə, matç keçirilməyib. Bilirsiniz ki, Əsasnaməyə görə hansısa komanda vaxtında oyuna gəlmirsə, meydana buraxılmır. Digər bütün matçlar Əsasnaməyə uyğun şəkildə keçirilib. Hakimlər də AFFA tərəfindən təyin olunmuşdu. Təşkilatçılıqla bağlı heç bir problem yoxdur".

O, texniki məğlubiyyətlə üzləşən komandaların növbəti oyunlara çıxacağını vurğulayıb:

"Təbii ki, cəza veriləndə narahatlıq keçiririk. Federasiya olaraq həmin komandaları və futbolçuları qazanmaq üçün çalışırıq. Növbəti oyunların hamısının baş tutmasına çalışacağıq".

Qeyd edək ki, AFFA U-14 Liqasında UGİM (Ordubad) və UGİM (Babək) komandaları təyin edilən vaxtda meydana çıxmadıqlarına görə oyunun keçirilməməsi səbəbindən 0:3 hesablı texniki məğlubiyyətlə üzləşiblər. AFFA U-13 Liqasında çıxış edən Sədərək rayonunun UGİM kollektivi isə heyətində yetəsay olmadığına görə oxşar şəkildə cəzalandırılıb.