Idman.biz
"Neftçi"yə yeni futbolçular gəlib, amma onlar haqda elə də çox məlumatımız yoxdur. Ən yaxşı futbolçular Latın Amerikasından gəldikdən sonra Avropada oynayanlardır.
İdman.biz xəbər verir ki, bunu "Neftçi"nin sabiq baş məşqçisi Tərlan Əhmədov Sportal.az saytına açıqlamasında deyib.
O, "ağ-qaralar"dakı heyət dəyişikliyi ilə bağlı danışıb. Bununla yanaşı, 2025/2026 mövsümündə "Neftçi"dən gözləntilərindən bəhs edib: "Qarabağ" həmişə Portuqaliya, İspaniya aşağı liqalarında oynayan braziliyalılara üstünlük verir. Çünki Avropa futbolunun məktəbi böyükdür. Amma Braziliyadan "Fluminense", "Flamenqo"dan oyunçu gətirmək başqa məsələdir, o heç. Yoxsa, Venesuela, Boliviyadan oyunçu gəlirsə, onların burada uyğunlaşması bir balaca çətindir. Çünki onlar Avropa futbol mərhələsinin adlamayıb. "Neftçi"də necə olacaq...."Neftçi"yə gələn məşqçilərə baxın, Adrian Mutu, Miodraq Bojoviç, Roman Qriqorçuk. Hələ Qriqorçukun Azərbaycan futbolunda böyük təcrübəsi var idi. "Neftçi" ağır klubdur, burada işləmək üçün rəhbərlik tərəfindən sənə böyük dəstək lazımdır. Mən özüm də bu komandada bir il baş məşqçi oldum. Komandanı sonuncu pillədən götürdüm, 3-cü pilləyə qədər yüksəltdim, amma sonda özünüz də gördünüz...Klubun strategiyası tamamilə fərqlidir, yanaşma da fərqlidir. Hamının gözü oradadır. Çünki xalqın komandası olub, əzəldən də belədir, "Neftçi"nin ad-sanı var, bu klubdan adlı-sanlı futbolçular dünyaya çıxıb. Anatoli Banişevskini desən, bəs edir. "Neftçi"nin heyətində Avropa, dünya və Olimpiya çempionları var. Ona görə də, bu istər-istəməz 2-ci və ya 3-cü yer qəbul olunmur. Son illərdə klub 2-ci pilləyə də yaxınlaşa bilmir. Komanda 2021/2022 mövsümündə çempion olub, ondan sonrakı illərdə fiaskoya uğrayır".
Əhmədovun fikrincə, "Neftçi" başa çatan mövsümdə də mükafatçılar sırasına düşə biləcək heyətə malik imiş: "Neftçi"də yeni futbolçularla məşqçilərin münasibəti necə olacaq, bunun da önəmi çoxdur. Əslində, komandanın keçən ilki heyəti də pis deyildi. O komanda ilə nəticə də vermək olardı. Samir Abasov komandanı oktyabr ayında götürmüşdü və həmin müddətdən sonra komandada nəyisə dəyişmək olardı ki, "Neftçi" mövsümü 6-cı pillə deyil, mükafatçılar sırasında başa vursun. Amma üzücü o idi ki, "Neftçi" autsayderlərə uduzurdu. Bu mövsüm necə olacaq, futbolçularla məşqçilərin münasibəti necə olacaq, hansı taktika seçiləcək...Ən əsası, o taktikaya uyğun fubtolçular cəlb edilib, ya yox, bir çox məsələlər var. Ötən mövsüm Samir Abasov deyirdi ki, komandanı mən yığmamışam. Bu mövsüm isə sərəncamında özü istədiyi oyunçular var. "Qarabağ", "Sabah", "Zirə" kimi komandalar oynayır, "Araz-Naxçıvan" güclənib, "Turan Tovuz" da həmçinin. Tovuz klubu ötən mövsüm əldən verdikləri şansı bu mövsüm buraxmaq istəməyəcəklər. Artıq rəqabət daha da çoxalır. "Neftçi" o rəqabətə uyğunlaşa biləcək, həmin rəqiblərdən üstün olacaq, ya yox...Biz indidən deyə bilmərəm ki, 4 mövsüm geridə qaldı, bu mövsüm "Neftçi" çempion olacaq. Zaman göstərəcək".
İdman.biz
