Idman.biz
"İlk qarşılaşmadakı nəticənin cütün taleyini müəyyənləşdirəcəyini düşünmürəm. Cavab oyunu öncəsi şanslar yenə bərabərdir. Belə oyunlarda bir məğlubiyyətlə hər şey bitmir, vəziyyəti dəyişmək imkanı həmişə olur. Çox nadir hallarda ilk matçdan sonra hər şey aydınlaşır".
İdman.biz xəbər verir ki, bu fikirləri Futbolinfo.az-a açıqlamasında Tərlan Əhmədov bildirib.
Təcrübəli mütəxəssis Konfrans Liqasındakı təmsilçilərimizin şanslarını dəyərləndirərkən daha sonra bunları qeyd edib: "Hər iki təmsilçimizdən qələbə gözləyirik. Əlbəttə, asan olmayacaq. "Omoniya" Elmar Baxşıyev üçün tanış rəqibdir. "Qəbələ"də işlədiyi dönəmdə də bu komandaya qarşı oynamışdılar. Rəqibin sabit və oturuşmuş heyəti var. Buna baxmayaraq, "Araz-Naxçıvan" bu mövsüm əvvəlki dövrlərlə müqayisədə daha təsirli çıxış edir. Komandaya keyfiyyətli legionerlər cəlb olunub və hər görüşdə performanslarını artırırlar. Hücumda daha aqressivdirlər, ancaq müdafiədə müəyyən boşluqlar müşahidə olunur. Əgər arxa xəttdə daha diqqətli oynasalar, bu oyunda üstünlük əldə edə bilərlər. İlk qarşılaşmanın evdə olması da üstünlükdür. Mümkün qədər çox qol vurmaq vacibdir ki, cavab matçında vəziyyət asanlaşsın. "Omoniya"nın aqressiv futbolunu ötən mövsüm "Zirə" ilə oyunlarında da görmüşdük. Onların vurduğu qollar hücum potensiallarının yüksək olduğunu sübut edir".
Əhmədov "Sabah"ın rəqibi "Levski" haqqında da danışıb: "Levski" avrokuboklarda zəngin təcrübəyə malikdir və köklü bir klubdur. Ancaq futbolda keçilməz rəqib olmur. Biz də komandalarımızdan uğurlu çıxış gözləyirik. Əgər bu mərhələyə qədər irəliləmişiksə, demək ki, şanslar bərabərdir. Az səhv edən və müdafiədə daha sıx oynayan tərəf növbəti mərhələyə keçəcək. Belə oyunlarda edilən səhvlər baha başa gəlir və cəzasız qalmır. Əsas arzumuz isə təmsilçilərimizin pley-offa vəsiqə qazanmasıdır".
Tərlan bəy hamının zəif yeri olduğunu düşünür: "Hər bir komandanın zəif nöqtələri olur. Əminəm ki, məşqçilər bunları dəqiq analiz edib və ona uyğun hazırlıq görüblər. Təmsilçilərimizin həm müdafiə, həm də hücum baxımından oyun üslubu kifayət qədər qiymətlidir. Belə məqamlarda rəqibə onun oyun tərzi ilə cavab vermək önəmli olur".
Əhmədov yekunda təmsilçilərimizə inamını ifadə edib: "Klublarımız heyət və oyun üslubu baxımından mərhələ keçəcək gücdədirlər. Yeni transferlər komandaya dinamika qatıb. Bu səbəbdən meydanda rəqib qarşısında çarəsiz görünməyəcəklər. Əgər hücumda daha aqressiv olub, yaranan imkanları dəyərləndirə bilsək, mərhələ adlayan tərəf biz ola bilərik. Futbolumuz artıq o səviyyəyə gəlib çatıb ki, transfer edilən legionerlər sayəsində komandalar daha iddialı çıxış etməyə başlayıblar. Ümid edək ki, təmsilçilərimiz əllərindən gələni edərək növbəti mərhələyə yüksələr. Hətta pley-offa keçə bilməsələr belə, buraya qədər göstərilən mübarizə də böyük nəticədir. Ən çox arzuladığımız isə qrup mərhələsində daha çox klubumuzun təmsil olunmasıdır. Futbol elə oyundur ki, hər an gözlənilməz nəticələr ortaya çıxa bilər. Ümid edək, bu sürprizlər xeyrimizə olar".
İdman.biz
