Idman.biz
"Bu oyun Azərbaycan Kubokunun digər finallarından çox fərqlənəcək".
Bunu İdman.biz-ə veteran futbolçu Tərlan Əhmədov deyib.
O, Azərbaycan Kubokunun "Qarabağ"la "Sabah" arasında keçiriləcək finalı öncəsi fikirlərini açıqlayıb. Mütəxəssis bildirib ki, hər iki komanda oyuna böyük önəm verir: "Final matçında şanslar həmişə bərabər olur. "Qarabağ" çempion olsa da, kubokun finalı tamam fərqlidir. "Sabah" turnir cədvəlində beşinci olsa da, Ağdam təmsilçisi üçün onlara qarşı həmişə çətin olub. Bu baxımdan "Qarabağ"ın favorit olduğunu düşünmürəm. Bəli, çempiondurlar və çalışırlar ki, "qızıl dubl" etsinlər. "Sabah" da istəyir ki, ilk dəfə kubok sahibi olsun. Bu da qarşılaşmanın gərgin keçəcəyindən xəbər verir. Fikrimcə, baxımlı oyun izləyəcəyik".
Millinin sabiq kapitanın sözlərinə görə, hər iki komandada müəyyən çatışmazlıqlar var: "Bu mövsüm "Qarabağ"ın müdafiə xəttində problemlərin olduğunu gördük, "Sabah"ın müdafiə xəttində isə həddindən artıq böyük problemlər var. Hər iki komanda bu oyunda müdafiədə daha az səhvə yol verməyə çalışacaq. Çox güman, "Qarabağ" öz oyunundan əl çəkməyərək, daha çox topa sahib olmaq istəyəcək. "Sabah"ın isə çox yaxşı əks-hücumları var. "Qarabağ" yarımmüdafiədə rəqibini üstələyir. Amma müdafiədə demək olar ki, iki komanda da bərabərsəviyyəli çıxış edir. Nəticə haqqında isə dəqiq nəsə demək mümkün olmasa da, fikrimcə, qalibiyyət minimal hesablı olacaq. "Sabah" "Qarabağ"a qarşı oynayanda çox istəkli olur".
Mütəxəssis matçın nəticəsinin digər klublar üçün əhəmiyyətinə də toxunub: "Kuboku "Qarabağ" götürsə, "Turan Tovuz" sevinəcək, "Zirə" isə Avropa Liqasında gedəcək. "Sabah" qalib gəlsə, birbaşa özü gedəcək. Maraqlı bir tendensiya yaranıb. "Turan Tovuz"un uzun müddətdən sonra avrokuboka getməsi böyük uğur olar. Bu nüanslar da final qarşılaşmasının mahiyyətinə xüsusilə rəng qatır".
Qeyd edək ki, "Qarabağ" - "Sabah" görüşünün start fiti bu gün saat 19:00-da səslənəcək. Oyun Mehdi Hüseynzadə adına Sumqayıt şəhər stadionunda keçiriləcək.
Aytac Sahəd
İdman.biz
