Tellur Mütəllimov "Sabah"ın uğursuz çıxışı barədə: "İzah etmək çətindir"

"Sabah" Misli Premyer Liqasının son turunda "Kəpəz"lə 2:2 bərabərliyə razılaşdı. Oyundan sonra "bayquşlar"ın Futbolçusu Tellur Mütəllimov Sport24.az-a müsahibəsində komandasının son oyunlardakı uğursuz çıxışı barədə danışıb.

- "Sabah" ötən tur "Kəpəz"lə matçda xal itirdi. Oyun haqqında fikirlərin necədir?

- Üstün olduğumuz oyun idi. Bəzi epizodları saymasaq, demək olar matçın böyük hissəsi bizim üstünlüyümüz şəraitində keçdi. Qol fürsətlərimiz oldu, dəyərləndirə bilmədik. Son dəqiqədə buraxdığımız qolla qələbə hesabını qoruya bilmədik.

- Ardıcıl 6 oyundur qələbə qazana bilmirsiniz. Səbəbi nədə görürsən?

- İzah etmək çətindir. Komanda olaraq hər birimiz qələbəyə köklənmişik. Bütün oyunlarda 3 xal üçün mübarizə aparırıq. Çıxdığımız qarşılaşmalarda bütün oyunlarda üstün tərəf olmuşuq. Amma son oyunlarda bu üstünlüyü hesabda əks etdirə bilmirik.

- Son iki oyunda son dəqiqələrdə qol buraxırsız. Hesabı qorumağa nə mane olur?

- Bəli, bu mövsümdə bir neçə oyunda son dəqiqələrdə buraxdığımız qolla 3 və ya 1 xalı əldən vermişik. Futbol 90 dəqiqə oynanılır. Fərqi yoxdur qolu 1-ci və ya 90-cı dəqiqədə buraxırsan. Məncə əsas olan qolun vurulma dəqiqəsi yox, hansı səbəbdən buraxmağımızdır. Bunun üzərində daim çalışırıq. İnanıram ki, qarşıdakı oyunlarda bu cür səhvlərə yol verməyək.

- Komandanın avrokuboklara vəsiqə qazanma şanslarını necə dəyərləndirirsən?

- Mövsüm hələ yarılanmayıb. İndidən turnir cədvəlinə baxıb nəsə fikir bildirmək doğru olmaz. Bəli, turnir cədvəlində rəqiblərimiz bizdən bir qədər aralanıb. Amma bu hələ hər şeyin bitdiyi anlamına gəlmir. Hədəfimizə çatmaq üçün sona qədər mübarizə aparacayıq.

- Milli komandalara görə yaranan fasilə işinizə yarayacaq, yoxsa?

- Milli fasilə hamı üçündür. Hər komanda bu fasilədə yol verdiyi səhvləri araşdırır və bunları aradan qaldırılması üçün çalışır Fasilənin hansı komandaya necə təsir etdiyini fasilədən sonra görəcəyik. Təbii ki, biz də bu fasilədə əvvəlki oyunlarda yol verdiyimiz səhvləri aradan qaldırmaq üçün var qüvvəmizlə çalışacayıq.

- Milli komandaya dəvət almadın. Bu barədə nə deyə bilərsən?

- Yığmada çıxış etmək hər bir futbolçu üçün fəxrdir. Millinin heyətini baş məşqçi Fernandu Santuş müəyyənləşdirir. Onun qərarına hörmətlə yanaşıram. Yığmamıza qarşıdakı oyunlarda uğurlar arzu edirəm.