Idman.biz
"Hələ ki, "Qarabağ"ın oyununda hər şey yaxşılığa doğru gedir. Təsnifat mərhələsindəki oyunlarda da, "Benfika" ilə görüşdə də komanda özünü ən yaxşı tərəfdən göstərə bildi".
Bu sözləri qol.az-a açıqlamasında 1990-cı illərdə "Qarabağ"ın futbolçusu olmuş, hazırda "Sabah" akademiyasının aşağı yaş qrupları üzrə koordinatoru işləyən Təbriz Həsənov deyib.
Həsənov 1998-ci ilin yayında UEFA-nın Kuboklar kuboku adlanan yarışında "Qarabağ"ın heyətində "Kopenhagen"lə keçirilən hər iki görüşdə 90 dəqiqə oynayıb. O, Ağdam klubunun UEFA Çempionlar Liqasının Liqa mərhələsinin 2-ci turunda bu gün "Kopenhagen"lə keçiriləcək oyunu öncəsi əvvəlcə 27 il əvvəlki qarşılaşmalardan (0:6, 0:4) danışıb:
"Böyükhesablı məğlubiyyətdən sonra xatirələr az olur. O vaxt bizim komandaların indiki kimi hazırlığı olmurdu. Deməzdim ki, heyətimiz pis idi. Amma istənilən kimi hazırlıq, şərait yox idi. Demək olar ki, bütün klublarımız elə ilk turdan mübarizəni dayandırırdı. Həm də böyükhesablı məğlubiyyətlərlə.
"Kopenhagen" həm fiziki olaraq güclü idi, həm də atletik futbol oynayırdı. Heyətlərində 1992-ci ildə Danimarkanın Avropa çempionu olduğu futbolçulardan 3-4 nəfər də vardı. Danimarkadakı görüşdə ilk dəqiqədən elə oynadılar ki, biz o tempi tuta bilmədik. 15, ya da 20-ci dəqiqədə artıq hesab 3:0 idi. Künc zərbələri zamanı daha çox çətinlik çəkirdik. Hamısı hündür və fiziki cəhətdən güclü futbolçu idi. Çox əziyyət çəkdik. Qapıçımız Camaləddin Əliyev hələ nə qədər qurtarışlar etdi. İkinci hissədə isə tempi tuta bildik. Tez buraxdığımız qollar bizi çətin duruma saldı. Bakıda da 0:4 uduzduq. Çalışırdıq ki, maksimum gücümüzlə oynayaq. Amma artığını edə bilmirdik. Çünki komandanın hazırlığı ora qədər idi".
Həsənov hazırda "Qarabağ"ın çox inkişaf etdiyini və "Kopenhagen"ə qalib gəlmək gücündə olduğunu da qeyd edib: "Qarabağ" sağ olsun ki, artıq bir dəfə ( 2017-ci ildə ÇL-in pley-off mərhələsindəki qarşılaşmaları (1:0, 1:2) nəzərdə tutur – red.) məğlubiyyətlərin heyfini çıxıb. Mən düşünürəm ki, bu gün də komandamız qalib gələcək. Hazırkı "Qarabağ" bu gücdədir. Demirəm ki, asan olacaq. "Kopenhagen" indi də güclüdür. Onların "Bayer"lə ilk turdakı oyununa baxdım. Çox yaxşı hücumçuları var. Əsas da sürətli əks-hücumlarda təhlükəlidirlər. Amma "Qarabağ"a inanır və uğurlar arzu edirəm. Bura qədər "Qarabağ" çox böyük işlər görüb. Deyərdim ki, öz boyundan hündürə tullanıb".
