Tahir Süleymanov: "Frank De Bleker də epizodları şərçi-ekspert kimi şərh edərək..."

"Qış fasiləsindən öncə də Premyer Liqa oyunlarında hakimlər səhvləri yetərincə idi. Çempionat finişə yaxınlaşdıqca, komandalar itirilən/qazanılan xalları daha həssaslıqla saymağa başlayırlar. Mövsümün ikinci yarısında baş verən hakim səhvləri ilə narazılıqlar futbol ictimaiyyəti arasında müzakirə edilir". Bu sözləri Sport24.az-a açıqlamasında FİFA referisi Tahir Süleymanov deyib.

Beynəlxalq dərəcəli ədalət təmsilçisi mövsümün ikinci hissəsində baş verən hakim səhvləri ilə bağlı fikirlərini bölüşüb:

"Ara-sıra məşqçilər fikir bildirir, o da əsasən, "danışmağın mənası yoxdur" çərçivəsindən kənara çıxmır. Böyük ölçüdə məşqçilərin günahı yoxdur, onların vəzifəsi komandalarını oyunlara hazırlamaqdan, qələbələr qazanmaqdan ibarətdir. Psixoloji məqamdır, hakim xətalarına görə turnir cədvəlində itirilən mövqe, sonda məşqçi istefaları ilə nəticələnir. Buna görə çalışdırıcılar özlərini müdafiə etmək məcburiyyətində qalırlar. Komanda anlayışı tək yaşıl meydanda futbolçulara aid deyil, klub-komandanın vahid birliyi çox önəmlidir. Belə hallarda komandanı sivil formada, qaydalara uyğun olaraq klub qorumalıdır. Əksər klub rəhbərləri, rəsmiləri özlərini pis etmək, hədəfə gəlmək, yerlərini itirmək istəmirlər. Kuluarlarda "qəhrəmanlıq" edənlərə, ictimaiyyət arasında söz sahibi olmayanlara ekspertlərin, jurnalistlərin, azarkeşlərin önə çıxması, fikir bildirməsi, etiraz etməsi sərfəlidir. Hətta bəzi hallarda klub rəhbərləri Hakimlər Komitəsini tərifləyir, baş məşqçiləri isə etiraz edir.

Belçikadan açıqlama verən Frank De Bleker də epizodları şərçi-ekspert kimi şərh edərək problemləri bitmiş sayır.

Sanki, De Blekere Azərbaycana Hakimlər Komitəsinin sədri yox, şərhçi kimi gətirilib, onunla müqavilə bağlanılıb.

İctimai nəzarət onsuz da var, mediada, ekranlarda epizodlar müzakirə edilir.

Klub səlahiyyətliləri önə çıxıb özlərini, komandalarını, azarkeşlərini müdafiə etməyi bacarmalıdırlar. Yaşıl meydanlarda, klub anlamında strateji/taktiki zəiflik göstərənlərin "strateji" gedişləri fonunda komandalarının haqsızlığa uğraması, məğlubiyyətlərə gətirib çıxarması təbiidir".