Idman.biz
"Neftçi"nin bolqarıstanlı sabiq yarımmüdafiəçisi Svetoslav Petrovun Futbolinfo.az-a müsahibəsi
– Əvvəlcə özünüz haqda danışardınız. Artıq neçə ildir ki, məşqçi kimi fəaliyyət göstərirsiniz…
– Bəli, hazırda Bolqarıstanın U-17 yığma komandasının məşqçisiyəm. Buna qədər Bolqarıstanın yüksək liqasında da məşqçilik etmişəm. Amma indi gənclərlə işləmək mənə daha xoş gəlir.
– Azərbaycandakı karyeranızı necə xatırlayırsınız? "Neftçi"də oynadığınız illər yaddaşınızda necə qalıb?
– Bakıda keçirdiyim illəri çox xoş hisslərlə xatırlayıram. "Neftçi"də özümü əla hiss edirdim. Keçən il "Qarabağ" Bolqarıstanda "Ludoqorets"lə oynayanda Zaur Tağızadə və Elçin Rəhimovla görüşməyə vaxt tapmışdım. Uzun zamandan sonra onları görmək mənim üçün xoş olmuşdu.
– "Neftçi"də 77 nömrəli formanı geyinirdiniz və daha çox cərimə zərbələrindən vurduğunuz qollarla xatırlanırsınız. "Ağ-qaralar"ın heyətində sizin üçün ən unudulmaz oyun və vurduğunuz qol hansı olub?
– Vurduğum bütün qollar mənim üçün çox önəmlidir və ayrı-ayrılıqda hər birini yaxşı xatırlayıram. Finalda qol vurub "Birlik Kuboku"nu qazananda çox sevinmişdim. Komandadakı hər kəsin və azarkeşlərin nə qədər xoşbəxt olduğunu görmək dəyərli hiss idi.
– Əfsuslar olsun ki, "Neftçi" uzun müddətdir adına layiq şəkildə çıxış edə bilmir. Son illərdə cəmi 1 çempionluğun əldə edilməsi də bunu təsdiqləyir. "Neftçi"nin yaşadığı uğursuzluqların səbəbini nədə görürsünüz?
– "Neftçi"nin niyə çempion ola bilmədiyinin səbəbini deyə bilmərəm, çünki komandada deyiləm. Amma digər tərəfdən Qurban Qurbanovun "Qarabağ"da gördüyü əla işi də nəzərə almaq lazımdır.
– Bu yay "Neftçi" xeyli sayda yeni transfer etdi. Azərbaycan çempionatının yeni mövsümündə "ağ-qaralar"dan hansı nəticəni gözləyirsiniz?
– Yeni futbolçuların gəlməsi dərhal çempionluq qazanılacağı demək deyil. Çempionluğa nail ola biləcək əla komanda formalaşdırmaq üçün çox lazımi məqamlar var.
– Konfrans Liqasındakı təmsilçilərimizdən olan "Sabah" turnirin 3-cü təsnifat mərhələsində Bolqarıstanın "Levski" klubu ilə qarşılaşacaq. Şansları necə dəyərləndirirsiniz?
– Hazırda "Levski" yaxşı oynayır, əla nəticələri var. Məncə, hər iki komanda güclüdür. Bu isə o deməkdir ki, bizi gözəl matçlar gözləyir.
– "Levski"nin güclü cəhətləri hansılardır? Bu komandanın heyətində ən təhlükəli futbolçu kimdir?
– Hazırkı "Levski"nin güclü cəhəti odur ki, əsl komanda oyunu sərgiləyirlər. Xüsusən hücum xəttində yaxşı oyunçuları var. Marin Petkov, Radoslav Kirilov və Everton Bala əla sürətə malik, birəbir oynamağı sevən, maraqlı futbolçulardır. "Levski"nin dayaq yarımmüdafiəçisi Georgi Kostadinovun oynamaması "Sabah" üçün üstünlük olacaq. Çünki o, "Levski"nin ən təcrübəli üzvlərindəndir.
– Bolqarıstan çempionatında çıxış edən, "Arda"nın formasını geyinən azərbaycanlı futbolçu Cəlal Hüseynov haqda nə deyə bilərsiniz? Sizcə, o, yaxın illərdə daha iddialı kluba keçə biləcək?
– Düzünə desəm, onun oyununu bəyənirəm. Düşünürəm ki, Cəlal yaxın zamanda daha ambisiyalı kluba keçmək üçün bütün lazımi keyfiyyətlərə sahibdir.
İdman.biz
