Idman.biz
Futbol üzrə Azərbaycan Premyer Liqasında yeni mövsümün startına bir aydan az müddət qalır.
Növbəti mövsüm uzun müddətdən sonra liqada 12 komanda çıxış edəcək. Avqustun 15-də start götürəcək çempionatın püşkü iyulun 18-də atılacaq.
Premyer Liqanın son mövsümlərinə nəzər salsaq, "Qarabağ"ın aşkar dominantlığını görmək mümkündür. Qurban Qurbanovun rəhbərlik etdiyi kollektiv son 4 mövsüm ardıcıl, son 12 mövsümdə isə 11 dəfə titulu başı üzərinə qaldırıb. "Köhlən atlar" yalnız 2020/2021 mövsümündə ikinci olub. Həmin il Premyer Liqanın digər titullu komandası "Neftçi" çempion olmağı bacarıb. Bəs görəsən, növbəti illərdə çempion dəyişəcəkmi?
İdman.biz xəbər verir ki, Teleqraf bununla bağlı "ChatGPT" süni intellektinə sorğu göndərib.
Süni intellekt "Qarabağ"ın növbəti illərdə də dominantıq edəcəyini bildirib. "Köhlən atlar"ın güclü heyəti və avrokubok tərcübəsi onları rəqibləri üçün əlçatmaz edir. 2025/2026 və 2026/2027 mövsümlərini qalib bitirəcək komanda sonrakı illərdə eniş yaşayacaq. Komandada nəsildəyişmə prosesi ağır keçəcək.
Heyətinə güclü ispaniyalı, serbiyalı və gürcüstanlı legionerlər transfer edən "Sabah" komandası isə "Qarabağ"ın düşüşündən istifadə edərək 2027/2028 mövsümündə tarixində ilk dəfə Azərbaycan Premyer Liqasının qalibi olacaq. Süni intellektin dediyinə görə, Masazır təmsilçisini çempionluğa gənc ispaniyalı baş məşqçi aparacaq. Maraqlı olan isə odur ki, hazırda "Sabah"ın baş məşqçisi Valdas Dambrauskasın köməkçilərindən biri 32 yaşlı ispaniyalı Kristian Sebalyosdur. O, 2021 - 2024-cü illərdə "Sabah"ın futbolçusu olub.
2028/2029 mövsümündə "Qarabağ"ın yenidən zirvəyə dönəcəyi gözlənilir.
Süni intellektə görə, "Neftçi" azarkeşləri çempionluğu 2029/2030 mövsümünə qədər gözləməli olacaq. "Ağ-qaralar" həmin il azarkeşlərin sevdiyi baş məşqçinin dönüşü ilə çempionluq kubokunu başı üzərinə qaldıracaq. Baş məşqçinin köməkçilərindən biri isə hazırda komandanın kapitanı Emin Mahmudov olacaq.
"Qarabağ" 2030/2031 mövsümündə yenidən çempion olacaq.
Növbəti ildə isə Azərbaycan Premyer Liqası tarixində yeni çempion olacaq. "Zirə" komandası etdiyi uğurlu transferlərdən sonra mövsümü birinci pillədə bitirəcək. "Qartallar" mövsüm ərzində ən az qol buraxan komanda olacaq. Bu isə komandada çıxış edən Gürcüstan millisinin əsas qapıçısının sayəsində baş tutacaq.
2032/2033-də "Qarabağ" yenidən çempionluq kubokuna yiyələnəcək. Komandanın təcrübəsi son turlarda çempionluq üçün əsas rol oynayacaq.
2033/2034 mövsümündə "Sabah" tarixində ikinci dəfə APL titulunu Masazıra aparacaq. Çempionluqdan sonra isə komandanın yetirmələri İsveçrə və Çexiya klublarına transfer olunacaq.
"Qarabağ" 2034/2035-də daha bir çempionluğunu bayram edəcək. Bu, bir mövsüm öncə komandanın sükanı arxasında gətirilən polşalı baş məşqçinin sayəsində olacaq.
Beləliklə, "ChatGPT" süni intellektinə görə, növbəti 10 mövsümdə "Qarabağ" 6, "Sabah" 2, "Neftçi" ilə "Zirə" isə bir dəfə Azərbaycan Premyer Liqasının qalibi olacaq.
İdman.biz
