Cari mövsümdə İntizam Komitəsi hər ev oyunundan sonra "Sumqayıt"ı Əsasnamənin tələblərini pozduğuna görə cərimələyir. Cərimələr üst-üstə yığılsa da, "kimyaçılar" Əsasnamənin tələblərini pozmaqda davam edirlər. Bəs nədi bu tələb, "Sumqayıt" niyə hər dəfə 500 manat cərimə olunur?
Sport24.az olaraq məsələ ilə maraqlandıq. Və məlum oldu ki, "kimyaçılar" qaza görə cərimə ödəyirlər. Daha doğrusu, "Sumqayıt"ın ev oyunlarını keçirdiyi Mehdi Hüseynzadə adına stadionun qazı kəsildiyindən qonaq komandalar matçdan sonra duş qəbul edə bilmirlər. Bu isə Əsasnamənin tələblərinin pozulması deməkdi.
Bəs niyə klubun rəhbərliyi bu problemə əncam çəkə bilmir və hər ev oyunundan sonra cərimələnir? Kluba yaxın mənbədən bizə verilən məlumata əsasən, söhbət heç də kiçik məbləğdən getmir. Stadionun qaza 100 min manata yaxın borcu var. Arena isə gənclər və idman nazirliyinin balansındadı. "Sumqayıt" arenanın xidmətindən icarədar kimi istifadə edir. Bu üzdən borcu da nazirlik bağlamalıdı. Ancaq qurum heç bir addım atımır və ödənişi Sumqayıt şəhər icra hakimiyyəti etməli olduğunu bildirir. Çünki "Mehdi Hüseynzadə" əvvəl icra hakimiyyətinin balansında olub, borc da o vaxtdan yığılıb qalıb. Belə anlaşılmaz durumda isə əziyyət çəkən klubdu.