“Sumqayıt”ın legioneri: “Özbəkistan çempionatının səviyyəsi bir qədər yüksəkdir”

"Sumqayıt"ın özbəkistanlı legioneri Casurbek Caloliddinov Sport24.az-a müsahibə verib.

- Öncə "Sumqayıt"la bağlı fikirlərini bilmək istərdik...

- Məni burada çox yaxşı qarşılaşdılar. Hər şey çox xoşuma gəlir. Komandada atmosfer əladı. Kubok oyununa hazırlaşırıq. Bizim üçün çox vacib oyundur.

- Komanda "qara zolağa" düşüb. Qələbə üzünə həsrət qalmaqla yanaşı, 8 oyundu ki, qol da vura bilmirsiz. Uğursuzluğun səbəbini nədə görürsən?

- Konkret səbəbin nə olduğunu bilmirəm. Neqativlər haqqında düşünmürük. Daha çox qarşıdakı oyunlara fokuslanmışıq. Qarşıda bizi "Sabah" ölkə kubokunun cavab qarşılaşması gözləyir. Ümid edirəm ki, azarkeşlərimizi sevindirəcəyik. Yarımfinala yüksəlmək üçün əlimizdən gələni edəcəyik.

- Son vaxtlar istər biz də, istərsə də dünyada özbək futbolçulara maraq artıb. Səncə, bu nədən qaynaqlanır?  

- Ölkəmizdə futbol sürətlə inkişaf edir. Millimiz demək olar ki, dünya çempionatına vəsiqə qazanıb. Bu da istər-iztəməz futbolçularımıza marağı artırır. Xaricə üz tutan oyunçularımızın da ümidləri doğrultması sözünü deyir.

- İki ölkənin futbolu arasında hansı fərqi görürsən?

- Böyük fərqin olduğunu deməzdim. Bizim ölkədə də hücum futboluna üstünlük verirlər ki, burda da eynisini görürəm. Fikrimcə, hər iki ölkənin futbolu bir-birinə oxşayır.

- Bəs iki ölkənin çempionatlarını müqayisə etsək? Azərbaycanda, yoxsa Özbəkistanda səviyyə yüksəkdi?

- Məncə, Özbəkistan çempionatının səviyyəsi bir qədər yüksəkdir. Demək olar, bütün komandalar Asiya Çempionlar Liqasında çıxış etmək istəyir. Ronaldo və onun kimi digər ulduzları Özbəkistana gətirmək üçün çalşırlar. Bu da istər-istəməz çempionatın səviyyəsini qaldırır.