“Sumqayıt”ın gürcüsü: “Azərbaycan çempionatının səviyyəsi gözlədiyimdən…”

"Sumqayıt" cari mövsüm üçün heyətinə qatdığı legionerlərdən biri də Giorgi Karaişvilidi. Vaxtilə Gürcüstan millisinə də dəvət alan 29 yaşlı mərkəz yarımmüdafiəçisi 6 oyunda yığmanın şərəfini qoruyub və bir qolun müəllifi olub. Karyerası ərzində Vətənində Tbilisi "Dinamo"sunun, İsveçdə "Heteborq"un, Macarıstanda  "Ferentsvaroş"un, Türkiyədə "Kocaelispor"in şərəfini qorumuş futbolçu Sport24.az-ın suallarını cavablndırıb.

- "Sumqayıt"a mövsümün gedişində qoşuldun. Tam formaya düşmüsən?

- Təəssüf ki, hələ yox. Tam formaya düşmək üçün müəyyən vaxta ehtiyacım var. İnanıram ki, qısa vaxtda buna nail olacam.  

- Karyeran ərzində müxtəlif klubların formasını geyinmisən. "Sumqayıt"da özünü necə hiss edirsən?

- Çox rahat. Çox mehriban kollektivimiz var. Səmimi deyirəm, komanda da ailə mühiti hökm sürür. Bu səbəbdən "Sumqayıt"da özümü heç də yad hiss etmirəm. Sanki neçə illərdi bu komandanın bir üzvüyəm. 

-  Macarıstan, İsveç, Gürcüstan, Türkiyə çempionatlarında çıxış etmisən. Çempionatımızın səviyyəsi barədə fikirlərini bilmək maraqlı olardı...

- Bəli, adını qeyd etdiyiniz ölkələrdə legioner həyatı yaşamışam. Hər birinin özünəxas ab-havası var. Çıxış etdiyim ölkələrlə Azərbaycanı müqayisə etmək istəmirəm. Yalnız onu deyə bilərəm ki, Azərbaycan çempionatının səviyyəsi  gözlədiyimdən daha yüksəkdi.

- Burda olduğun müddətdə artıq bütün elita klubları ilə qarşılaşmısız. Premyer Liqada oyununu bəyəndiyin komanda hansıdı?

- Əlbəttə ki, öz komandam… "Sumqayıt"I hamsından çox bəyənirəm. Amma onu da qeyd edim ki, digər 9 klubun da  özünə görə üstün və zəif cəhətləri var.

- Yaxşı onda onda sualı belə qoyaq. Çempionatımızda  bəyəndiyin və xoşuna gəlməyən məqamlar? Hakimlik, təşkilatçılıq, infrastruktur, azarkeşlər necədi?

- Bu suala nə cavab verəcəyimi bilmirəm, çünki heç vaxt bu barədə düşünməmişəm. İşimi sevirəm və həmişə çalışmışam ki, çıxış etdiyim çempionata  uyğunlaşəm.

- Qısa vaxtda iki baş məşqçinin rəhbərliyi altında çıxış etmək imkanın olub. Vaqif Cavadovla Samir Abasov arasında nə fərq var?

- Hər iki məşqçi çox tələbkar və qarşıya qoyulan məqsədə çatmaq istəyən mütəxəssisdi. Mənim üçün onların hər ikisi işləmək rahatdı.