Idman.biz
Sumqayıt şəhərinin 17-ci mikrorayonunda yerləşən stadion hazırda baxımsız və yararsız vəziyyətdədir.
İdman.Biz-in məlumatına görə, ərazinin uzun müddətdir nəzarətsiz qalması sakinlərin narazılığına səbəb olub.
Sosial şəbəkələrdə aparılan müzakirələr zamanı yerli sakinlər bildiriblər ki, bu ərazi illər əvvəl futbol stadionu kimi fəaliyyət göstərib və şəhərin idman həyatında mühüm rol oynayıb. Xüsusilə 1980-ci illərdə stadion məktəblilər və gənclər üçün əsas futbol meydançalarından biri olub.
Yerli sakinlərdən biri həmin dövrlə bağlı xatirəsini belə bölüşüb:
"Bəlkə də bu stadionda ilk dəfə top qovlayanlar mənim yaşıdlarım olub. Söhbət 1980-ci illərdən gedir. 4 nömrəli məktəbin açılan ilk birinci sinif şagirdlərindən biri olmuşam. Bu, təxminən 48 il əvvəl idi".
Sakinlərin sözlərinə görə, vaxtilə uşaqların və yeniyetmələrin sevimli məkanı olan stadion bu gün tamamilə baxımsız vəziyyətə düşüb. Ərazidə nə idman infrastrukturu qorunub saxlanılıb, nə də təhlükəsizlik təmin olunur.
