“Sumqayıt” bəyanat yaydı

"Sumqayıt" klubu bəyanat yayıb. Sport24.az xəbər verir ki, "Kimyaçılar" klub prezidenti Riad Rəfiyev ilə idman jurnalistləri arasında gedən məhkəmə prosesi ilə bağlı detallara toxunub:

"Hörmətli media nümayəndələri və futbolsevərlər!

Nəzərinizə çatdırmaq istəyirik ki, "Sumqayıt" Futbol Klubunun prezidenti Riad Rəfiyevin jurnalistlər – Anar Şabanoğlu və İxtiyar Əsgərovla bağlı qaldırdığı məhkəmə iddiası ilə bağlı müraciət ərizəsində müəyyən yanlışlıqlar gedib.

Təqdir edərsiniz ki, məhkəmə mübahisələri hüquqşünasların icrasında olan məsələdir, iddia ərizəsi vəkil tərəfindən hazırlanıb və təəssüf ki, qeyd olunan informasiyaların bəziləri dəqiqləşdirilmədən, xüsusilə bir neçə epizodda termin xətaları ilə birlikdə vəkilin imzası ilə və onun tərəfindən məhkəməyə təqdim olunub. Qarşı tərəfin iddialarının əksinə olaraq, hansısa yalan məlumat yox, yanlış məlumat qeyd edilib.

Xüsusilə iddiaların mərkəzində yer alan "Çempionlar Liqası" ifadəsi klubun qısa zaman kəsiyində 3 dəfə iştirak etdiyi (Bir dəfə Avropa Liqası, iki dəfə isə Konfrans Liqası) "Avrokuboklar" ifadəsinin əvəzinə yanlışlıqla yazılsa da, bu, şikayət mətninin mahiyyətini və Riad Rəfiyevin uğurlu idarəedici persona olması reallığını dəyişmir.

Əlavə olaraq qeyd etmək istərdik ki, məhkəmə icraatında olan bir işlə, həmçinin şəxslərin fərdi, şəxsi və ailə həyatı ilə bağlı məlumatların əks olunduğu bu cür paylaşımlar etmək qanunvericiliyə ziddir.

Komandamızın ölkə çempionatı və kubokunda vacib oyunlarının olduğu bir zamanda azarkeşlərimizdən və idman ictimaiyyətindən bu kimi ciddi əsası olmayan iddialara qarşı verdiyimiz açıqlamalara görə bizi üzrlü hesab etmələrini, əsas diqqəti meydandakı mübarizəyə ayırmaqlarını xahiş edirik".