Sport24.az
"İlk hissədə istədiyimiz oyunu sərgiləyə bilmədik. Amma fasilədən sonra daha yaxşı təsir bağışladıq. Tovuz səfərindən ən azı 1 xalla dönmək istəyirdik. Təəssüf ki, alınmadı". Bu sözləri Sport24.az-a açıqlamasında "Səbail"in futbolçusu Süleyman Əhmədov deyib.
"Dənizçilər"in müdafiəçisi komandasının qeyri-sabit çıxışına da münasibət bildirib: "Çempionat yeni başlayıb. 5 oyuna görə komanda barədə fikir formalaşdırmaq düzgün olmaz. Onu da nəzərə almaq lazımdı ki, mövsümlərarası fasilədə kollektiv demək olar yenidən qurulub. Bəli, geridə qalan qarşılaşmalarda parlaq oyun nümayiş etdirə bilməmişik. Amma bu müvəqqətidi. Turlar ötdükcə daha güclü olacağıq. Özümə gəlincə, bir müddət zədəyə görə kənarda qaldım. Amma artıq sağalmışam və baş məşqçi güvənəcyi halda meydanda əlimdən gələni edəcəm ki, komandaya faydalı olum. İnanıram ki, qısa vaxtda əvvəlki formamı bərpa edəcəm".
Qeyd edək ki, Premyer Liqanın V turunun açılış oyununda "Səbail" səfərdə "Turan Tovuz"a 0:1 hesabı ilə məğlub olub.
