Stefan Kenni: "Maliyyə mütəxəssisi deyiləm, müqayisə edə bilmərəm"

Konfrans Liqasının III təsnifat mərhələsində sabah keçiriləcək "Sabah" - "Sent Patriks" oyunundan öncə qonaqların baş məşqçisi Stefan Kenni mətbuat konfransında jurnalistlərin suallarını cavablandırıb. İrlandiyalı mütəxəssis "Sabah"ın güclü komanda olduğunu vurğulayıb.

- Oyuna tam hazırlaşa bilmisiniz?
- Bəli. Uzun yoldan gəlmişik və həftəsonu çempionatda ağır matç keçirmişik. Buna baxmayaraq, oyuna hazırlaşmışıq.

- Çempionatda oyunun təxirə salınmasını istəmisiniz. Demək olar, pley-off mərhələsinə köklənmisiz...
- Bizim komandamız imkanlı və böyük deyil. Maliyyəmiz də geniş deyil ki, hər iki turnirə yaxşı hazırlaşaq. Çoxmillətli klub da deyilik. Sabahkı oyun ağır olacaq. Hədəfimiz sərfəli nəticə qazanıb, mərhələ adlamaqdır.

- Sabah uduzsanız, bunu faciə kimi qəbul edəcəksiz?
- Futbol baxımından normal haldır. "Sabah" ambisiyalı və bizdən daha imkanlıdır. Məğlub olsaq, normal qarşılayacağıq.

- Səhv etmirəmsə, ikinck səfərinizdir Bakıya. Daha əvvəl İrlandiya yığmasının baş məşqçisi kimi burdan qələbə ilə dönmüşdüz. iBu dəfə necə düşünürsüz?
- Həmin vaxt çox yaxşı qələbə qazanmışdıq. Ümid edirəm, yenə elə olar. Bu dəfə fərqli oyundur. Hər iki komanda mərhələ adlamaq istəyir.

- Büdcəni qabartdınız. İki komandanı müqayisə etsəniz, hansı mənzərə ortaya çıxar?
- Maliyyə mütəxəssisi deyiləm, müqayisə edə bilmərəm. Futbola köklənmişik.

- "Sabah"ın sizdən hansı üstün tərəfləri var?
- "Makkabi" ilə oyunu misal çəkmək olar. Güclü komandaya qalib gəldilər. Çətin görüş olacaq. Özümüzü bu matça kökləmişik.