Idman.biz
"Sabah"ın qazaxıstanlı qapıçısı Stas Pokatilovun Futbolinfo.az saytına müsahibəsi
– Misli Premyer Liqasının 4-cü turunda "Neftçi" ilə qolsuz heç-heçə etdiniz. Sizcə, nəticə oyuna görə oldu?
– Çətin oyun oldu. Bu görüşdə bir neçə yeni futbolçumuz şans qazanmışdı. Onların kollektivə uyğunlaşması, komandanın oyun sisteminə öyrəşməsi üçün müəyyən vaxt lazımdır. "Neftçi" ilə görüşdə hər şey heç də istədiyimiz kimi alınmadı. Buna baxmayaraq, fikrimcə, nəticə ədalətli oldu. Öz üzərimizdə çalışmalı, yol verdiyimiz nöqsanları, çatışmazlıqları aradan qaldırmalıyıq.
– "Sabah" çempionatda 3 oyuna 4 xal toplayıb. Bu nəticə sizi razı salır?
– Əlbəttə, yox. Biz hər oyuna qələbə üçün çıxırıq. Məqsədimiz budur. Amma bayaq da dediyim kimi, çatışmazlıqlar üzərində çalışmalıyıq. İnanıram ki, bundan sonra bizdə hər şey alınacaq.
– "Transfer pəncərəsi"nin son günlərində "Sabah" heyətinə 3 yeni oyunçu qatdı. Timoteuş Puxaç, Aaron Maluda və Aleksey İsayev haqda fikriniz necədir? Onlar komandanın gücünə güc qata biləcəklər?
– Yeni gələnlər kifayət qədər keyfiyyətli oyunçulardır. Düşünürəm ki, onların bizimlə olması komandada ümumi keyfiyyətin və rəqabətin artmasına səbəb olacaq ki, bu da müsbət amildir.
– Növbəti turda "Turan Tovuz"u qəbul edəcəksiniz. Şansları necə dəyərləndirirsiniz?
– Şanslar barədə danışmaq istəməzdim. Sadəcə, onu deyə bilərəm ki, komanda olaraq əlimizdən gələni edəcəyik ki, meydandan 3 xalla ayrılaq.
– "Zirə" və "Araz-Naxçıvan" ötən mövsümdəki kimi, yenə iddialıdırlar. "Turan Tovuz"un 4 oyuna 3 qələbə qazanması bu komandanın da avrokuboklara iddialı olduğunu göstərir. Üstəlik, mövsümə uğurlu başlamış "Sumqayıt" var. "Neftçi" də qələbə seriyasına başlasa, "Sabah"ın avrokuboklara vəsiqə qazanmaq işi daha da çətinləşməyəcək?
– Bu komandalar mövsümə çox yaxşı başlayıblar. Bu da çempionata əlavə rəng qatır, daha rəqabətli liqa halına gətirir. Biz komanda olaraq öz oyunumuz və nəticələrimiz barədə düşünürük. Yalnız qarşıdakı matçlarımıza, bu oyunlarda qələbəyə köklənirik.
– Azərbaycan çempionatında çıxış edən ən yaxşı qapıçılardansınız. Maraqlıdır, siz özünüz Premyer Liqamızda çıxış edən qolkiperlərdən kimləri daha çox bəyənirsiz?
– Xoş sözlərinizə görə təşəkkür edirəm. Amma mən digər komandaların yox, öz qapıçılarımız barədə fikirlərimi bildirmək istərdim. Hazırda komandamızda olan Nicat Mehbalıyev, Rüstəm Samiqullin və Rauf Əyyubov kifayət qədər bacarıqlı qapıçılardır. Onlar öz üzərlərində indiki kimi çalışmağa davam etsələr, inanıram ki, Azərbaycanda ən yaxşı qapıçılardan olacaqlar.
İdman.biz
