Idman.biz
Moldova millisinin sabiq qapıçısı,vaxtilə Azərbaycanda AZAL və "Şamaxı"da çıxış etmiş Stanislav Namaşko UEFA Konfrans Liqasının II təsnifat mərhələsində "Petrokub" (Moldova) və "Sabah" kollektivləri arasında keçiriləcək oyunlar barədə danışıb.
İdman.biz xəbər verir ki, bu barədə AZƏRTAC-a açıqlama verən 38 yaşlı qolkiper Moldova çempionatını yaxından izləmədiyini bildirib: "Hazırda "Petrokub"un necə oynadığını tam olaraq bilmirəm. Onlar keçən mövsüm bir neçə dəfə baş məşqçini dəyişiblər. Düşünürəm ki, əvvəl komandanın oyununda təşkilatçılıq var idi. İndi isə klub ayrı-ayrı futbolçuların individual oyunlarına üstünlük verir. Təmsilçimiz stabil oyun nümayiş etdirmir".
Namaşko "Sabah"ın yaxşı təşkilatlanmış komanda olduğunu söyləyib: "Çətin oyun olacaq. "Sabah" evdə daha əzmkar mübarizə aparır. Hər iki komandanın mərhələ adlamaq şansı var".
Qeyd edək ki, "Petrokub" - "Sabah" görüşü iyulun 24-də Kişineudakı "Zimbru" stadionunda Bakı vaxtı ilə saat 21:00-da başlayacaq. Komandalar arasında cavab qarşılaşması isə iyulun 31-də "Bank Respublika Arena"da təşkil olunacaq.
İdman.biz
