Idman.biz
İspaniya futbolunun ən böyük ulduzları 2025-26 mövsümündə La Liqa çempionluğu uğrunda mübarizənin ilk yarısında əsas rolları oynayıblar.
İdman.Biz xəbər verir ki, mövsümün yarısında turnir cədvəlinin ilk pillələrində "Barselona", "Real Madrid" və "Atletiko Madrid"in yer alması sürpriz deyil. Hər üç klubun heyətində demək olar ki, hər tur oyunun taleyini həll edə bilən futbolçular var.
Ən tanınmış adlardan əlavə, mövsümün ilk 18 turunda fərdi çıxışı ilə seçilən və diqqətdən kənarda qalan bir sıra oyunçular da fərqlənib. Qiyməti az bilinən müdafiəçilər, gözlənilməz bir yarımmüdafiəçi və mübahisəsiz bir qapıçı mövsümün indiyə qədərki ən yaxşı 11-liyində yer alıb.
"Sports Illustrated" nəşrinin versiyasına görə La Liqanın 2025-26 mövsümünün indiyə qədərki ən yaxşı komandası belədir:
Qapıçı:
Marko Dmitroviç ("Espanyol") - katalon klubunun turnir cədvəlində beşinci yerdə olmasının əsas səbəblərindən biridir. Yeddi oyunda qapısını toxunulmaz saxlayıb, xilasetmə faizi 76,7-dir və bu göstərici Tibo Kurtuanın 71,9 faizini üstələyir.
Sağ cinah müdafiəçisi:
Markos Llorente ("Atletiko Madrid") - sürəti, dözümlülüyü və üç məhsuldar ötürməsi ilə Dieqo Simeonenin əsas fiqurlarından biridir.
Mərkəz müdafiəçisi:
Rafa Marin ("Vilyarreal") - 15 buraxılmış qolla liqanın ən möhkəm müdafiəsinə rəhbərlik edir, hava toplarında dominantdır və intizamlı oyunu ilə seçilir.
Mərkəz müdafiəçisi:
Erik Qarsiya ("Barselona") - müdafiənin zəif olduğu dövrdə stabillik gətirib, universallığı və liderliyi ilə fərqlənib.
Sol cinah müdafiəçisi:
Alvaro Karrerras ("Real Madrid") - 22 yaşında əsas heyətə uyğunlaşıb, həm müdafiədə sabitlik, həm də hücumda dinamika qatıb.
Mərkəz yarımmüdafiəçisi:
Pedri ("Barselona") - texnika, oyun oxuma və temp idarəsi baxımından liqanın ən yaxşı yarımmüdafiəçisi kimi qiymətləndirilir.
Mərkəz yarımmüdafiəçisi:
Luis Milla ("Xetafe") - altı məhsuldar ötürmə ilə liqada ikinci yerdədir və komandasının oyun ritmini müəyyənləşdirir.
Hücumameyilli yarımmüdafiəçi:
Cud Bellinqem ("Real Madrid") - cəmi 11 startda 4 qol və 3 məhsuldar ötürmə ilə komandasını dəfələrlə oyuna qaytarıb.
Sağ cinah hücumçusu:
Lamin Yamal ("Barselona") - 7 qol və 7 məhsuldar ötürmə ilə liqanın ən məhsuldar oyunçularındandır.
Hücumçu:
Kilian Mbappe ("Real Madrid") - 18 qolla Piçiçi mükafatı yarışına ("Marca" nəşri tərəfindən hər mövsüm La Liqada ən çox qol vuran oyunçuya təqdim edilən mükafat) başçılıq edir və La Liqanın ən təhlükəli qolçusudur.
Sol cinah hücumçusu:
Ferran Torres ("Barselona") - 17 oyunda 11 qol vurub və Piçiçi yarışında ikinci pillədə qərarlaşıb.
Beləliklə, "Sports Illustrated"in siyahısında "Barselona" və "Real Madrid" futbolçuları üstünlük təşkil edir və mövsümün ilk yarısına damğa vuran əsas fiqurlar kimi ön plana çıxırlar.
