Sport24.az
Oyundan öncə fikirini öyrəndiyimiz mütəxəssislərin demək olar hamısı "Qarabağ"ın "Elfsborq" səfərindən 3 xalla dönəcəyini bildirmişdi. Ağdam təmsilçisinin İsveçdə futbolsevərlərimizi sevindirəcəyinə inananların sayı çox idi. İlk növbədə ona görə ki, Skandinaviya ölkəsində çempionat başa çatdığından "Elfsborq" oyun təcrübəsindən əziyyət çəkirdi. İkincisi də Qurban Qurbanovun komandasının pley-offa adlaması üçün 3 xal vacib idi. Səviyyə və təcrübə baxımından da "süvarilər"i rəqibi üstələyirdi.
Təəssüf ki, təmsilçimiz ümidləri doğrultmadı, İsveçdən əliboş döndü. Bəs "Qarabağ"ın 3 xal qazanmasına nə mane oldu? İlk növbədə onu qeyd edək ki, ağdamlılar üzərlərinə düşən təzyiqin altından çıxa bilmədilər. Məğlubiyyət qorxusu komandanın ehtiyatlı oynamağa vadar etdi. Yersiz dala-qabağa ötürmələr, ağır oyun "Qarabağ"a İsveç təmsilçisini məğlub etməyə imkan vermədi. "Elfsborq"un rəqibi taktiki cəhətdən də üstələdiyini qeyd etmək lazımdı. İlk hissəni bir qədər passiv keçirən meydan sahibləri fasilədən sonra sürəti bir xeyli artırınca, istədiyinə nail oldu. 57-ci dəqiqədə fərqlənən isveçlilər sonadək minimal üstünlüyü qoruya bildilər ki, bunu da onların uğurundan çox "Qarabağ"ın "dişsizliyinin" adına yazmaq olar. Qurbanovun komandası dünənki matçda hücumda demək olar heç nə ilə yadda qalmadı.
Hər bir baş məşqçi sərəncamında keyfiyyətli futbolçularla yanaşaı, oturuşmuş heyətin olmasını istəyir. Bəli, oturuşmuş heyət yaxşıdı, futbolçular bir-birini bir baxışdan başa düşür, xətlərarası əlaqə yüksək olur, anlaşma göz oxşayır. Təəssüf ki, "Qarabağ"ın indiki heyəti "oturub", futbolçular sanki meydana istəksiz çıxır. Bu üzdən ağdamlılara "yeni qan", uğura ac, irəli getməyi düşünən, daha böyük zirvələri fəth etmək üçün alışıb-yanan futbolçular lazımdı.
Pley-offa yüksəlmək yönündə hələ hər şey itirilməyib. Ağdamlılar nəzəri cəhətdən Liqa mərhələsini adlaya bilər. Ancaq təəssüf ki, "Elfsborq"a məğlubiyyətdən sonra "Qarabağ"ın taleyi öz əlində deyil. Təmsilçimizin növbəti mərhələyə vəsiqə qazanması üçün turnir cədvəlində qonşu olduğu komandaların qarşıdakı iki turda böyük hesabla məğlub olması gərəkdi. Eyni zamanda "süvarilər" də növbəti iki matçda maksimum nəticə qazanmalı, bacardığı qədər rəqiblərindən qapısından çox top keçirməlidi. Amma nə qədər acı da olsa etiraf edək ki, indiki "Qarabağ"ın bunu bacaracağı heç də inandırıcı görünmür.
