Idman.biz
Cənubi Koreyanın hücumçusu Son Heunq-Min barədə qalmaqallı şantaj işi ilə bağlı məhkəmə qərarı açıqlanıb. Seul Mərkəzi Dairə Məhkəməsi futbolçunu saxta döl ultrasəs görüntüsü ilə şantaj etməyə cəhd edən qadını - yalnız "Yanq" kimi təqdim edilən şəxsi 4 il müddətinə azadlıqdan məhrum edib.
İdman.Biz xəbər verir ki, hadisə Sonun hələ İngiltərənin Premyer Liqa təmsilçisi "Tottenhem"də çıxış etdiyi dövrdə baş verib.
Qadın 2024-cü ildə futbolçuya döl ultrasəsinin şəklini göndərərək, uşağın ona məxsus olduğunu iddia edib və susması müqabilində 300 milyon von (təxminən 350 000 AZN) tələb edib. Sonradan o, "Yonq" adlı kişi ilə birləşərək daha çox məbləğ əldə etməyə cəhd göstərib.
Məhkəmənin qərarında bildirilib ki, qadının iddialarını təsdiqləyən heç bir sübut yoxdur. "Yonq" öz günahını etiraf edib və 4 il həbs cəzası alıb. "Yanq" isə şantaj ittihamlarını rədd etsə də, məhkəmə onu təqsirli bilib.
MLS-də "Los-Anceles FC"nin formasını geyinən 33 yaşlı Son Heunq-Min dünya futbolunda nümunəvi peşəkarlığı ilə tanınır. Yaxın ətrafının bildirdiyinə görə, bu cəhd futbolçunu emosional olaraq ciddi şəkildə sarsıdıb və onun imicinə xələl gətirmək məqsədi daşıyıb.
