Sport24.az
"Sabah"ın futbolçusu Sofian Çakla Sport24.az-a müsahibə verib. İspaniyalı müdafiəçi həm "Kəpəz"lə oyunu dəyərləndirib, həm də bizi maraqlandıran başqa sualları cavablandırıb.
- Premyer Liqanın V turunda "Kəpəz"in qonağı olduz. Oyunla bağlı fikirlərini bilmək istərdik...
- "Kəpəz" turnir cədvəlində sonuncu olsa da, çox təhlükəli rəqibdi. Xarakteri olan kollektivdi. Gərgin matç oldu. İlk yarıda zəif çıxış etdik, amma fasilədən sonra toparlandıq və adımıza layiq mübarizə apardıq. Gəncəlilər üzərində çətin qələbədən sonra çox sevincliyəm.
- Müdafiədə çox boşluq verirsiz, səbəb nədi?
- Çox qol buraxmağımızı ancaq müdafiəyə bağlamaq düz deyil. Futbol kollektiv oyundu. Hamı səhv edə bilər və həmin səhvlərdən sonra qapımızda qollar görürük. Amma bu çatışmazlığı aradan qaldıracağıq.
- Ötən mövsüm müdafiənin mərkəzində Maruan Hadudiylə, bu il isə Con İrasabal ilə duet təşkil edirsən. Bəlkə hələ bir-birinizi tam başa düşmürsüz?
- Belə deməzdim, çünki ötən mövsüm də Hadudidən çox İrasaballa birgə oynayırdım. Bizim bir yerdə oynamağımızda problem yoxdu, düşünürəm ki, qarşıdakı turlarda daha uğurlu olacağıq.
- Necə düşünürüsən, "Sabah" bu mövsüm çempionluq uğrunda mübarizə apara bilər?
- Hər oyuna qələbə üçün çıxırıq. Əlbəttə ki, maksimum yaxşı mübarizə aparmaq və bacardıqca irəli getmək istəyirik. Düşünürəm ki, pillə-pillə qarşımıza qoyduğumuz hədəfə çatacağıq.
ABDULLA İSMAYILOĞLU
