Idman.biz
"Legiya"nın belaruslu futbolçusu İlya Şkurin siyasi səbəblərə görə komanda ilə Qazaxıstana getmir.
İdman.biz xəbər verir ki, polşalı jurnalist Kşiştof Marçinyakın məlumatına görə, 25 yaşlı hücumçu UEFA Avropa Liqası təsnifat mərhələsində "Aktobe" ilə cavab oyununa yollanmaqdan imtina edib (ilk oyunda "Legiya" qələbə qazanıb – 1:0).
Şkurin Belarus hakimiyyətinin Qazaxıstanın təhlükəsizlik orqanlarına müraciət edərək ona problem yarada biləcəyindən narahatdır. Bunun səbəbi yəqin ki, onun 2020-ci ilin yayında Belarus prezidenti Aleksandr Lukaşenkonu tənqid etməsidir.
2020-ci ilin avqustunda, hələ Moskva ÇSKA-sında oynayarkən, Şkurin yazmışdı: "Milli komandanın geniş heyətinə düşdüyümü yenə sosial şəbəkələrdən öyrəndim, cavabımı da burada yazıram. Lukaşenko rejimi davam etdiyi müddətdə milli komandanı təmsil etməkdən imtina edirəm."
O vaxtdan bəri Şkurin həqiqətən də heç bir yığmada oynamayıb: nə əsas millidə, nə də gənclər komandasında.
Bir ay sonra onu Avropa çempionatının seçmə mərhələsində Niderland və Portuqaliyaya qarşı oyunlar üçün gənclər yığmasına çağırdılar. O, toplanışa qatılmadı. 2020-ci ilin dekabrında Belarus Futbol Federasiyası FIFA-ya şikayət etdi, lakin təşkilat hücumçunun tərəfində oldu və onu cəzalandırmadı.
Şkurini 2021-ci ildə əsas və gənclər yığmalarının rəsmi heyətindən çıxardılar. Bu siyahı Belarus Gənclər və İdman Nazirliyinin sənədidir və futbolçulara hərbi xidmətdən möhlət hüququ verir. Hücumçunun artıq bu imtiyazı yoxdur.
Bir il sonra Şkurin belə deyirdi: "Çağırış vərəqələri alırdım, hətta evimə də gəlmişdilər. Orduya qarşı deyiləm, amma Belarusdakı indiki vəziyyəti nəzərə alaraq xidmət etmək istəmirəm. Dəqiq indi yox. Cinayət işi aça bilərlər? Bu mümkündür".
Hücumçunun meneceri Valeri İsayev deyirdi ki, futbolçuya təzyiq göstərilir: "Dedilər ki, İlya millinin düşərgəsinə gəlməlidir və oynamaqdan imtina etdiyini orada deməlidir. Amma bilirdik ki, federasiya rəhbəri ona təzyiq etmək üçün hərbi xidməti şantaj vasitəsinə çevirmişdi. Açıq dedilər: əgər İlya gəlməsə, onu aparacaqlar".
Təxminən həmin vaxt Şkurin Rusiyanı tərk etdi. Geri qayıtmaq barədə sualı isə "təxribat" adlandırmışdı.
ÇSKA-dan ayrıldıqdan sonra hücumçu beş klub dəyişdi – müxtəlif yerlərdə icarədə oldu. Əvvəlcə yarım il Kiyev "Dinamo"sunda oynadı, 2022-ci ilin fevralında Polşanın "Rakuv" klubuna yollandı. 2022-ci ilin payızında İsrailin 2-ci divizion təmsilçisi "Makkabi Petah-Tikva"ya keçdi. 2023-cü ilin iyulunda onu Polşanın "Stal Mielets" klubu dəvət etdi. Orada əla çıxış etdi – çempionatda 16 qol vurdu. Bir ara "Bolonya"nın ona marağı barədə yazdılar, amma bu məlumat təsdiqlənmədi. Şkurin ÇSKA ilə müqaviləni başa vurub, Polşada qaldı, amma ikinci mövsümdə yalnız 5 dəfə fərqləndi.
Amma bu statistik göstəricilər belə "Legiya"nı fikrindən çəkindirmədi. 2025-ci ilin fevralında Varşava klubu onu 1,2 milyon avroya transfer etdi. Polşa çempionatında hələ məhsuldar oynamır – cəmi iki qol vurub. Amma həm ölkə kubokunun finalında fərqlənib, həm də bu yaxınlarda Polşa Superkubokunda qələbə qolunu vurub. "Aktobe" ilə ilk oyunda da meydana çıxıb. Amma cavab görüşündə komandasına kömək edə bilməyəcək.
Qeyd edək ki, Şkurin 2017-2019-cu illərdə Belarusun U-21 yığmasında 6 oyun keçirib və 1 qol vurub. Əsas millidə isə çıxış etməyib.
İdman.biz
