"Şkendiya"nın baş məşqçisi "Qarabağ"ı favorit hesab etməsinin səbəblərini açıqlayıb

"Şkendiya" UEFA Çempionlar Liqası 3-cü təsnifat mərhələsinin ilk oyunu çərçivəsində öz meydanında "Qarabağ"ı qəbul edəcək. Sport24.az xəbər verir ki, Şimali Makedoniya təmsilçisinin baş məşqçisi Jeton Beqiri matçdan öncə keçirilən mətbuat konfransında fikirlərini bildirib:

"Avrokuboklarda hər komandanın özünəməxsus keyfiyyətləri var. Komanda olaraq maksimum səviyyədə olmaq vacibdir. Daha sonra həftə ərzində təhlillər apararaq, rəqibin güclü tərəflərini təhlil edərək, onları zərərsizləşdirməyə və yaradılan imkanlardan istifadə etməyə çalışacağıq. Söhbət son dərəcə ciddi komandadan gedir. "Qarabağ" 12 mövsümdə 11 dəfə çempion olub. Onların 17 il ardıcıl komandaya rəhbərlik edən çox ciddi və yaxşı baş məşqçiləri var. Rəqibə hörmətlə yanaşsaq, hər an özümüzə hörmət etməyi unutmayacağıq.

Bizim üçün ən yüksək səviyyədə çıxış etmək çox vacibdir. FKSB ilə ilk matçdan sonra oyundan razı deyildim. Bilirdim ki, irəliləmək üçün daha yaxşı oynamalıyıq. İnanıram ki, şanslarımız çox olacaq. Çox diqqətli olmalı, şansımızdan istifadə etməliyik.

Düşünürəm ki, 90 dəqiqəlik futbol həm hücum, həm də müdafiə vəziyyətləri gətirir. Biz əlimizdən gələni etməyə çalışan komandayıq. Normalda elə vəziyyətlər olur ki, hücumda çox aqressiv oluruq və ya elə vəziyyətlər olur ki, yaxşı müdafiə olunuruq. Amma buna baxmayaraq, düşünmək və qol vuracağımıza ümid etmək lazımdır. İstər Bakıdakı, istərsə də Skopyedəki matçda bu, ən vacib məsələdir.

"Qarabağ"la əvvəlki rəqibimiz FKSB arasında müqayisə aparmaq istəməzdim. Çünki söhbət müxtəlif tipli komandalardan gedir. İnanıram ki, "Qarabağ"ın gücü onların baş məşqçisi və uzun müddətdir bir yerdə olan, komandanı ciddiləşdirən bəzi oyunçulardır. Biz rəqibə hörmət etməliyik. Əlbəttə ki, onları favorit hesab edirik. Amma hər şeyi sanımaq üçün 90 dəqiqə var.

"Qarabağ" təcrübəli komandadır. Orada Şimali Makedoniya və Albaniyada da oynamış futbolçular var. Onlar çox sərmayə qoyan klubdur. Amma inanmıram ki, bu detallar matça təsir etsin. Futbol həmişə bir çox komponentdən ibarətdir. VAR sistemi, vərəqələr, fərdi səhvlər, komanda şəklində səhvlər var. Pis gecə də ola bilər, mükəmməl gecə də. Demək istəyirəm ki, futbolda hər şey gözlənilir. Müsbət nəticə üçün meydanda öz gücümüzü ortaya qoyacağıq".