Sport24.az
"Artıq təlim-məşq toplanışına start vermişik. İyulun 7-nə kimi gündə bir dəfə məşq etməklə kifayətlənəcəyik. Səbəb bəzi yığma üzvlərinin düşərgədə olmamasıdı. Rusiya və Qazaxıstanda oynayan qızlarımız bu ayın 7-8-də kollektivə qoşulacaq. Heyətimizdə bir itki var. Aysun Seyidova əməliyyat olunduğu üçün onun xidmətindən istifadə edə bilməyəcəyik. Şükürlər olsun ki, digər yığma üzvləri toplanışa qatılacaq". Bu sözləri Sport24.az-a açıqlamasında qadınlardan ibarət yığmanın baş məşqçisi Siyasət Əsgərov deyib.
Millinin baş məşqçisi qarşıdakı 2 matçda uğurlu nəticəyə fokunlandıqlarını bildirib: "Bizi qarşıda iki ağır görüş gözləyir. Hər iki rəqib olduqca güclüdü. Maksimum nəticəyə köklənsək də, əsas diqqətimizi Macarıstanla oyuna yönəltmişik. Belə ki, onlarla ilk oyunda heç-heçəyə nail olmuşuq. Yenə xal götürsək, pley-off şansımızı saxlayacağıq. Yox, əgər hər iki matçdan xalla ayrılsaq, qrup 2-cisi kimi birbaşa B səbətinə vəsiqəni təmin edəcəyik. Məni qayğılandıran məqamlardan biri odur ki, macarlarla görüşdə iki futbolçum cəzalı olduğu üçün meydana çıxa bilməyəcək. Fikrimcə, cəzalıların yerinə forma geyinəcək oyunçular bu yoxluğu hiss etdirməyəcək".
Qeyd edək ki, Əsgərovun yetirmələri iyulun 12-də "Liv Bona Dea Arena"da Macarıstan, 16-da isə Lozannada İsveçrə yığması ilə qarşılaşacaq.
