Sport24.az
"İlk dəfə idi belə turnirdə iştirak edirdik.Hər iki rəqib bizdən güclü idi. İlk oyunda Gürcüstan təmsilçisinə məğlub olsaq da, ikinci matçda "Qothenburq"a qarşı yaxşı mübarizə apardıq. Oyunun gedişində 2 topr fərqi ilə geri düşsək də, özümüzdə güc tapıb hesabı bərabərləşdirə bildik.Bizim üçün belə oyunların çox faydası var, yaxşı təcrübə oldu". Bu sözləri Sport24.az-a açıqlamasında "Şimal"ın oynayan baş məşqçisi Tural Cəlilov deyib.
Ötən mövsüm Region Liqasının qalibi olan Xaçmaz klubunun baş məşqçisi UEFA Regionlar Kubokunda iştiraklarından razı qaldıqlarını bildirib: "Bu turnirdə iştirak çempionluq hədiyyəsi idi. Gürcüstanda yaxşı şərait gördük. Həm qidalanma, həm qaldığımız otel, həm də məşqlərimiz ürəyimizcə oldu. Çox istərdim ki, nə vaxtsa Xaçmazda bizim də belə şəraitimiz olsun".
Qeyd edək ki, UEFA Regionlar Kubokuna qatılan "Şimal" Gürcüstanın Kutaisi şəhərində təşkil edilən ilkin mərhələnin B qrupunda yerli "Football School Bridge" klubuna 0:5 hesabı ilə məğlub olub. Azərbaycan təmsilçisi qrupdakı ikinci matçını İsveçin "Qothenburq" komandasına qarşı keçirib və görüş 2:2 hesabı ilə yekunlaşıb.
