Idman.biz
"Şamaxı"nın yeni transferlərindən olan braziliyalı müdafiəçi Sezar Henrikenin Futbolinfo.az-a müsahibəsi
– Artıq 1 aydır ki, "Şamaxı"ya qoşulmusunuz. Adaptasiya prosesi necə keçir? Kollektivə tam uyğunlaşmağınız üçün daha nə qədər zamana ehtiyacınız var?
– Buraya gəldiyim gündən etibarən heç bir çətinlik çəkmirəm. Baxmayaraq ki, əksər oyunçuların və məşqçilərin danışdığı dildə danışmıram. Hamı mənə həm meydanda, həm də meydandan kənarda ehtiyacım olan hər şeydə kömək edir.
– "Şamaxı"ya keçmək qərarını verərkən tərəddüd etdinizmi? Qərarınızda nə həlledici rol oynadı?
– Onsuz da qərar verərkən həmişə bir az tərəddüd olur. Axı məsələ ölkəmi tərk edib uzaq bir yerə getmək idi. Amma "Şamaxı" klubu, oyunçulara təqdim olunan infrastruktur barədə araşdırma apardıqdan sonra çox düşünməyə ehtiyac duymadım. Sadəcə, burada olmaq və klubun uğuru üçün oynamaq istədim.
– Azərbaycan çempionatının startına sayılı günlər qalıb. "Şamaxı" yeni mövsümə tam hazırdır?
– Uzun müddətdir ki, çox intensiv şəkildə çalışırıq. Hazırlıq prosesi müddətində liqadakı digər komandalarla yoldaşlıq oyunları keçirmişik və hazırda çempionatın debütü üçün lazım olan son detalları tamamlayırıq.
– İlk turda "Neftçi"nin qonağı olacaqsınız. Rəqib haqda nə qədər məlumatınız var? Bu oyundan hansı nəticəni gözləyirsiniz?
– Nəticə barədə konkret bir şey deyə bilmərəm. Çünki futbol çox qeyri-müəyyən idman növüdür. Amma yaxşı oyun göstərmək üçün tam hazır olacağıq. Onu deyə bilərəm ki, qələbə qazanmaq üçün əlimizdən gələni edəcəyik.
– "Şamaxı"nın hazırkı heyəti legionerlərlə gənc yerli futbolçuların vəhdətindən formalaşıb. Bir-birinizi başa düşməkdə çətinlik çəkməyəcəksiniz ki?
– Hər gün birlikdə yaşayırıq, qarşılaşdığımız hər bir çətinliyin öhdəsindən birlikdə gəlirik. Buna görə də problem olmayacağını düşünürəm.
– Azərbaycan çempionatında xeyli sayda braziliyalı futbolçu çıxış edir. Onlardan kimləri tanıyırsınız?
– Bəli, bu məqam liqanın çox keyfiyyətli olduğunu sübut edir. Azərbaycan Premyer Liqasında çıxış edən daha bir braziliyalı olacağım üçün və "Şamaxı"nın formasını geyinəcəyimə görə çox sevincliyəm.
İdman.biz
