Idman.biz
Misir millisinin və İngiltərənin "Liverpul" klubunun cinah hücumçusu Məhəmməd Salahın gələcəyi ilə bağlı sensasion iddia ortaya çıxıb. Səudiyyə Ərəbistanından olan adı açıqlanmayan bir klub ulduz futbolçu üçün rekord səviyyədə maliyyə təklifi hazırlayıb.
İdman.Biz "Indykaila News"a istinadla xəbər verir ki, sözügedən klub Salahı heyətinə qatmaq üçün ona həftədə 2,5 milyon funt-sterlinq (təxminən 5,4 milyon AZN) maaş təklif edib. Bu isə illik təxminən 120 milyon funt-sterlinq (təxminən 258 milyon AZN) deməkdir.
Təklif olunan məbləğ Avropanın aparıcı futbol ulduzlarının qazancını xeyli üstələyir. Məsələn, İngiltərənin "Mançester Siti" klubunun hücumçusu Erlinq Holand həftədə təxminən 525 min funt (təxminən 1,13 milyon AZN), İspaniyanın "Real Madrid" klubunun forvardı Kilian Mbappe isə 600 min funt (təxminən 1,29 milyon AZN) maaş alır. "Barselona"nın gənc istedadı Lamin Yamal isə bu göstəricilərdən dəfələrlə az qazanır və hələlik Avropanın ən çox qazanan futbolçuları siyahısına daxil deyil.
33 yaşlı Salah 2017-ci ilin yayından "Liverpul"da çıxış edir. O, mersisayd təmsilçisinin heyətində İngiltərə Premyer Liqasını, Çempionlar Liqasını, ölkə kuboklarını və klublararası dünya çempionatını qazanıb.
Cari mövsümdə Salah klub səviyyəsində 19 oyuna çıxıb, 5 qol vurub və 3 məhsuldar ötürmə ilə yadda qalıb.
Qeyd edək ki, Səudiyyə Ərəbistanının "Əl Xulud" klubunun rəhbəri Ben Harburq Riyaddakı Dünya Futbol Sammitində çıxışı zamanı "Liverpul"un hücumçusu Məhəmməd Salahın Səudiyyə Pro Liqasına uyğun olmadığını söyləyib.
