Idman.biz
"Milli komandamızın turnirə inamlı şəkildə başlaması sevindirici haldır və ümid edirik ki, bu uğurlu çıxış final qarşılaşmasında da davam edəcək".
İdman.biz xəbər verir ki, bunu AFFA-nın icraçı vitse-prezidenti Sərxan Hacıyev jurnalistlərə açıqlamasında deyib.
O, milli komandadan qızıl medal gözlədiyini qeyd edib:
"Belə turnirlər gənc futbolçular üçün böyük əhəmiyyət daşıyır. Onlar gələcəyin peşəkar idmançılarıdır və bu yarışlarda iştirak etməklə həm təcrübə, həm də inam qazanırlar. Qazanılan uğurlar növbəti turnirlər üçün əlavə motivasiya yaradır. Komandamız ciddi şəkildə hazırlaşıb, AFFA rəhbərliyinin də xüsusi tapşırıqları olub. Bu baxımdan, finalda da yaxşı nəticə göstərəcəyimizə inanırıq".
AFFA rəsmisi həmçinin Azərbaycanın beynəlxalq arenada artan nüfuzuna diqqət çəkib:
"Azərbaycan və Özbəkistanın 2027-ci ildə 20 yaşadək futbolçular arasında dünya çempionatına ev sahibliyi etməsi böyük məsuliyyət və eyni zamanda etimad göstəricisidir. Bu qərar FİFA-nın ölkəmizə olan inamını nümayiş etdirir. Əminik ki, həmin oyunlar da yüksək səviyyədə təşkil olunacaq".
Qeyd edək ki, III MDB Oyunlarına oktyabrın 8-də yekun vurulacaq.
