Idman.biz
Futbol üzrə Azərbaycan millisinin formasını geyinmiş Sərtan Taşkın mövsümlərarası fasilədə "Sumqayıt"dan Türkiyə 1-ci Liqasına yüksələn "Serik Belediyespor"a keçib.
27 yaşlı futbolçu İdman.biz-ə açıqlamasında yeni komandasının qarşıdakı mövsümə hazırlığından danışıb.
O, "Serik Belediyespor"da işlərinin qaydasında olduğunu, uyğunlaşma prosesinin çətin keçmədiyini deyir: "Komanda yoldaşlarımın çoxu yenidir, heyət təzə yığılıb. O səbəbdən hamı bir-birinə dəstək olur. Komandamız Antalya bölgəsində yerləşir. Bu həftə yeni mövsüm başlayır. Kiçik toplanışdayıq, oyuna hazırlaşırıq. İstanbula yola düşəcəyik. Avqustun 9-da "İstanbulspor"la oyunumuz var".
Sərtan komandanın rusiyalı baş məşqçisi Sergey Yuranın etimadını qazanıb, əsas heyətin üzvü olacağına inandığını deyib: "Komandaya bir az gec qoşulduğumdan, birinci təlim-məşq toplanışında qatılmamışam. İkinci toplanışdan məşqlərdə iştirak edirəm. Məşqçinin mənə yanaşması yaxşıdır. Əsas heyətdə oynamaq üçün özümü göstərməliyəm. Ümid edirəm ki, ilk "11-liy"ə düşə biləcəyəm".
Qeyd edək ki, "Serik Belediyespor"la 1 il müddətinə müqavilə imzalayan Sərtan Taşkın 2024-cü ildə Türkiyədə "Manisa"da çıxış edib.
İdman.biz
