Sport24.az
Ötən mövsüm Türkiyənın I Liqasında mübarizə aparan "Manisa"nın şərəfini qoruyan Sertan Taşkın bu yay Vətənə dönərək "Sumqayıt"la anlaşıb. 26 yaşlı müdafiəçi Sport24.az-a müsahibəsində həm karyerasının Türkiyə dönəmi barədə danışıb, həm də bizi maraqlandıran başqa sualları cavablandırıb.
- Legioner həyatın qısa çəkdi. Türkiyədə karyeranın uğursuz alınmasına səbəb nə oldu?
- Uğursuz oldu deməzdim. Sadəcə, istədiyim kimi olmadı. Bunun da səbəbi klubumuzda ciddi maliyyə problemlərinin olmasıydı. Sonra klubun prezidenti bütün futbolçuları yığıb dedi ki, gələn mövsüm üçün gözlənilən ödənişləri edə bilməyəcəm. Belə olduqda mən də daxil 17 futbolçu komandadan ayrıldı.
- Türkiyənin başqa klublarından təklif yox idi?
- Var idi. Sadəcə, orda bəzi qaydalar var ki, adamı bezdirir. Əsas da status məsələsiylə bağlı idi. Məsələn, bəzi türkdilli ölkələrin oyunçuları Türkiyədə legioner hesab olunmur. Mən isə legioner sayılırdım. Türk futbolçu statusuna keçmək alınmadı. 3-4 klubdan təklif gəlmişdi.
- Başqa ölkələrə yollanmaq variantı var idi?
- Açığı, təklif var idi, amma elə də ciddi deyildi.
- Sonda niyə məhz "Sumqayıt"ı seçdin?
- Real təkliflər arasında ən optimalı "Sumqayıt"dan gəldi. Bundan başqa Samir Abasovun işini bəyənirəm və onun rəhbərliyi altında çıxış etmək istədim.
- Son turda komandan doğma meydanda "Səbail"i 2:1 məğlub etdi. Kənardan oyunu izləyənlər arasında sən də vardın. Matçla bağlı fikirlərin maraqlıdı...
- Ümumi götürəndə pis oyun olmadı, sadəcə, əlimizə düşən fürsətlərdən lazımınca yararlana bilmədik və qollar gec gəldi. Düşünürəm ki, turlar irəlilədikcə daha yaxşı çıxış edən "Sumqayıt" görəcəyik.
ABDULLA İSMAYILOĞLU
