Serbiya Futbol Assosiasiyası UEFA-ya Avro-2024-tərk edə biləcəkləri ilə bağlı xəbərdarlıq edib. Sport24.az Britaniyanın "The Sun" nəşrinə istinadən xəbər verir ki, bu haqda qurumun baş katibi Yovan Surbatoviç məlumat verib.
O, Avro-2024-ün digər 2 iştirakçısı - Albaniya və Xorvatiyanın azarkeşlərinin Serbiyaya qarşı xoşagəlməz şüarlar səsləndirdiklərini bildirib. Serbiya tərəfinin iddiasına görə, azarkeşlər serbləri öldürməyə çağırışlar ediblər. Bu olay Avro-2024-ün dünən keçirilən Xorvatiya - Albaniya matçının (2:2) 59-cu dəqiqəsində baş verib.
Yovan Surbatoviç baş verənlərə bağlı bunları vurğulayıb: "İlk növbədə öz azarkeşlərimizə İngiltərə ilə oyunda göstərdikləri dəstəyə görə təşəkkür etmək istəyirəm. Ümid edirəm ki, Sloveniyanı məğlub edəcəyik. Bu hadisə isə hiddət doğurur. Biz UEFA-dan bu insanlara qarşı sanksiya tətbiq olunmağı, hər iki federasiyanın cəzalandırılmasını tələb edəcəyik. Ölçü götürürlməsə turnirdə oynamaqdan imtina edə bilərik. UEFA tədbir görməyəcəyi halda biz sonrakı addımlarımızı düşünməli olacağıq".