Idman.biz
ABŞ Prezidenti Donald Trampa Dünya Çempionatı-2026-nın Vaşinqtonda keçirilən püşkatma mərasimi zamanı təqdim olunan "sülh mükafatı" üçün hazırlanmış bürünc heykəlcik həm dünya futbolunda, həm də Azərbaycanda böyük marağa səbəb olub.
Sonradan məlum olub ki, həmin heykəlcik Səlhab Məmmədov və Əli İbadullayevin müəllifi olduğu məşhur "Düşüncələr və xəyallar" heykəlinin mini-nüsxəsidir. Bu əsərin orijinalı hazırda Cenevrədə - BMT-nin baş qərargahının qarşısında yerləşir.
İdman.Biz məsələ ilə bağlı heykəlin müəlliflərindən biri - Xalq rəssamı, Azərbaycan Dövlət Rəssamlıq Akademiyasının prorektoru və Rəssamlar İttifaqı sədrinin birinci müavini Səlhab Məmmədovdan eksklüziv açıqlama alıb.
"FIFA bütün futbol federasiyalarına müraciət edib bu yeni nominasiyanı, sülh mükafatının heykəlciyi üçün öz variantlarını təqdim etmələrini istəmişdi. Bizim Əli İbadullayevlə birgə yaratdığımız heykəl onların da diqqətini çəkibmiş. Düşünürəm ki, onu ona görə seçdilər ki, əsər təşkilatın dəyərlərini əks etdirir və bu nominasiyaya mükəmməl şəkildə uyğun gəlir. Heykəl yer kürəsi həm də futbol topunu simvolizə edir; müxtəlif ölkə və qitələrin insanları onu birgə tutur. Heykəlin nüsxəsi ilə yanaşı, bizdən medal və xatirə nişanı hazırlamağı da sifariş etdilər. Çünki nominasiyanın qalibinə yalnız heykəlcik deyil, həmin komplekt tam şəkildə təqdim olunacaq", - deyə Səlhab Məmmədov bildirib.
"Əlbəttə, dünya futbolunda bu şəkildə iz qoyduğumuza və belə əhəmiyyətli bir mükafat üçün məhz azərbaycanlı heykəltəraşların əsərinin seçilməsinə çox sevinirəm. Yeddi il əvvəl dördmetrlik heykəlimiz BMT-nin qarşısında ucaldılan zaman onun bir gün FIFA-ya lazım olacağını heç təsəvvür etmirdik. Açığı, bu mükafat ətrafında belə böyük ajiotaj olacağını da gözləmirdim", - Xalq rəssamı əlavə edib.
Vüqar Vüqarlı
