"Qəbələ"nin qolkiperi Səlahət Ağayev Sport24.az-a müsahibə verib. Təcrübəli "çərçivə qoruyucusu" həm I liqadan gedən mübarzidən, həm də komandasının oyunundan danışıb.
- İkinci turda "Qaradağ Lökbatan"ı böyük hesabla məğlub etdiz. Qəsəbə təmsilçisini öz meydanında belə hesabla yenəcəyinizi gözləyirdin?
- Lökbatana qələbə üçün gəlmişdik. Amma 5 qol vuracağımızı gözləmirdik. "Qaradağ Lökbatan" yetəri qədər güclü və I Liqada ən təcrübəli komandalardandı. Meydan sahibləri oyuna pis başlamadılar. Sadəcə, erkən qol vurduq və bundan sonra təşəbbüs bizim tərəfimizə keçdi. Sonradan daha 4 qol vurmaqla böyük hesablı qələbəni rəsmiləşdirdik.
- Necə düşünürsən, "Qəbələ"yə yeni transferlər lazımdı?
- Kollektivə yeni qoşulanlar var ki, komandaya tam uyğunlaşmayıblar. Buna baxmayaraq, onların adaptasiyasının uzun çəkəcəyini düşünmürəm. Ümumi götürəndə isə komandamız komplektləşib.
- "Qəbələ"də sən, Asif Məmmədov və Elvin Yunuszadə kimi təcrübəli futbolçular yer alır. Gənclərlə bir yerdə oynamaq sizə çətinlik yaratmır?
- Bizim tərifə və təqdimata ehtiyacı olmayan baş məşqçimiz var. Hamı onu yaxşı tanıyır. Kaxaber Tsxadadze "Qəbələ"də yaxşı follektiv formalaşdırıb. Gənclər təcrübəli futbolçulara hörmətlə yanaşırlar.
- I Liqada özünü necə hiss edirsən?
- Heç şebhəsiz ki, elitanın səviyyəsi I Liqadan qat-qat üstündü. Ancaq burda da maraqlı komandalar var. Əsas istəyimiz bu il çempion olub, yenidən "Qəbələ" ilə birgə Premyer Liqaya dönməkdi.
ABDULLA İSMAYILOĞLU