Səkkiz ildən sonra: 9 qat çempionun 9 xalı

Misli Premyer Liqasında mövsümün təxminən 1/3 hissəsi arxada qalıb.

İdman.biz xəbər verir ki, ilk 12 turun yalnız təxirə salınan iki oyunu baş tutmayıb.

İki baş məşqçi ilə 9 xal
Çempionatın arxada qalan hissəsinin ən böyük uğursuzu "Neftçi"dir. 9 qat ölkə çempionu mövsüm ərəfəsindəki transferləri və Roman Qriqorçuku baş məşqçi təyinatı ilə iddialı olacağı siqnalı versə də, "ağ-qaralar" nəinki çempionluq, hətta avrokubok mübarizəsindən çox uzaq düşüb.

10 komanda arasında 8-ci olan komanda 9 turdan sonra baş məşqçisini də dəyişib. Qriqorçuk və onu əvəzləyən Samir Abasovun dövründə ümumilikdə 9 xal yığılıb.

Səkkiz ildən sonra
"Neftçi" hər turda orta hesabla 1-dən də aşağı, cəmi 0,75 xal toplayıb. Doqquzqat çempionun 9 xal yığmasının nə qədər acınacaqlı olmasını tarix də göstərir.

Azərbaycan çempionatlarının daimi iştirakçısı 33-cü mövsümündə öz antirekordunu təkrarlayıb. 8 il əvvəl də ağır günlərini yaşayan "Neftçi" ilk 12 oyununda vur-tut 9 xal yığmışdı.

Görünməmiş eniş
Avrokuboklardan kənar qalmaq kimi uğursuzluğun qeydə alındığı ötən mövsümün müvafiq dövründə Bakı klubunun 18 xalı var idi. Bu, indiki göstəricidən 2 dəfə artıqdır.

Tarixə nəzər salsaq, əvvəlki mövsümlə müqayisədə belə eniş olmayıb. İlk dəfə "ağ-qaralar" 12 turdan sonra bir il əvvəlkinin yarısı ilə kifayətlənib.

Tarixdə 6-cı dəfə
Daim liderlər sırasında olan paytaxt təmsilçisi adətən 12 tura 20 və ya daha çox xal yığıb. 33 mövsümdə 6-cı dəfə belə göstərici əlçatmaz olub.

Ümumiyyətlə, "Neftçi" ilk dəfə 2008/09 mövsümündə "20"yə çatmayıb. Düzdür, ilk 4 mövsümdə qələbəyə 3 deyil, 2 xal verilib. Müqayisənin düzgün olması üçün həmin illərdə də indiki qaydanı tətbiq etsək, ilk 4 çempionatdakı 12 turda ən aşağı göstərici 23 xala bərabərdir. İlk dəfə 2008/09 mövsümündə xal hesabında 20-yə çatmayan "ağ-qaralar" 2015-17-ci illərdə ardıcıl üç çempionatda belə uğursuzluq yaşayıb. 2015/16 və 2017/18 mövsümlərində 2008/09-dakı 13 xalla göstərici təkrarlanıb, 2016/17 isə antirekordla yadda qalıb. Sonrakı 5 il daha yaxşı səviyyədə keçsə də, həm ötən, həm cari mövsüm yenə uğursuz başlayıb.

Unudulmaz "92"
"Neftçi"nin tarixində ən yaxşı 12 oyunluq start isə ilk çempionata təsadüf edib. Həmin vaxt Əhməd Ələsgərovun komandası ardıcıl 12 qələbə ilə o vaxtkı qayda ilə 24 xal yığıb. Bu, indiki hesablama ilə 36 xala bərabərdir. Həmin nəticə isə cari mövsümdəkindən 4 qat üstündür.

1992-ci ilin unudulmaz seriyası sonradan startda təkrarlanmasa da, daha üç dəfə 30 xal səddi fəth olunub. Çempionatın ilk 12 oyununun nəticələri 1994/95 və 2000/01 mövsümlərində 32, 1996/97-də isə 31 xala uyğun olub.

"Neftçi"nin ilk 12 oyunda topladığı xallar
1992 - 36
1993 - 23
1993/94 - 23
1994/95 - 32
1995/96 - 27
1996/97 - 31
1997/98 - 20
1998/99 - 21
1999/2000 - 26
2000/01 - 32
2001/02 - 26
2003/04 - 29
2004/05 - 26
2005/06 - 21
2006/07 - 21
2007/08 - 24
2008/09 - 13
2009/10 - 20
2010/11 - 27
2011/12 - 25
2012/13 - 21
2013/14 - 25
2014/15 - 22
2015/16 - 13
2016/17 - 9
2017/18 - 13
2018/19 - 29
2019/20 - 21
2020/21 - 21
2021/22 - 20
2022/23 - 25
2023/24 – 18
2024/25 – 9