Idman.biz
"Turan Tovuz"un futbolçusu Şəhriyar Əliyev Futbolpress.az-a müsahibə verib. Həmin müsahibəni təqdim edirik:
– "Kəpəz"ə qalib gəldiyiniz oyunda şans qazanmadınız. Bu, zədə ilə bağlıdır, ya necə?
– Baş məşqçinin qərarıdır. Zədəm yoxdur.
– Rəqabətdə digər müdafiəçilərə uduzursunuz?
– Rəqabətdə uduzduğumu düşünmürəm. Baş məşqçinin qərarıdır. Rəqabətdən çəkinməmişəm, sona qədər mübarizə aparmışam. Uzun müddət zədəli olduqdan sonra indi qayıtmışam. Şans olacağı halda, oynamağa hazıram. Özümə, gücümə bələdəm, rəqabətdən çəkinmirəm.
– 6 turdan sonra lidersiniz. Zirvədə qalmaq mümkün olacaq?
– Turnir cədvəlində birinciyik, inşallah, davamı gələr. Yuxarı sıralarda qalmaq çətindir. Burda rəqabət həddindən artıq çoxdur. Allah nəsib edər, mövsümün sonuna qədər burda qala bilərik. Əlimizdən gələni edəcəyik.
– "Sabah"a məğlubiyyətdən (0:2) sonra komandaya ciddi tənqidlər oldu. "Kəpəz"ə qalib gəlsənizdə, rəqibin durumu göz önündədir. Ötən mövsümlə müqayisədə oyununuzda eniş olduğunu hiss etmirsiniz?
– Mövsümün əvvəlidir. Gedənlərimiz və yeni gələnlərimiz var. Zədəlilərin qayıtması, yenilərin uyğunlaşması zaman tələb edən prosesdir. Zamanla daha yaxşı olacağıq. Azarkeşlərimizi sevindirməyə çalışacağıq.
– Mövsümöncəsi klub rəhbəri hədəfin çempionluq olduğunu dedi. Məqsədə çatmaq nə dərəcə real görünür?
– Xallarımız yaxşıdır, cəmi 2 oyunda məğlub olmuşuq. Çempionatın əvvəlidir və qarşıda uzun marafon var. Ağır yarış olacaq. Çalışacağıq ki, üst sıralarda olaq. Reallıqdır ki, bu mövqelər üçün çox komanda mübarizə aparır. Çalışacağıq ki, hədəflərimizə çataq, avrokuboklara gedə bilək.
